धक्कादायक! घरात आढळला एकाचा अर्धनग्न अवस्थेत मृतदेह, घटनेने उडाली खळबळ…
लोणी काळभोर : नातेवाईकाला भेटण्यासाठी आलेल्या एकाचा राहत्या घरात अर्धनग्न अवस्थेत मृतदेह आढळल्याची धक्कादायक घटना समोर आली आहे. ही घटना लोणी काळभोर (ता.हवेली) ग्रामपंचायत हद्दीतील माळी मळा परिसरात घडली असून आज (ता.२७) बुधवारी दुपारी एक वाजण्याच्या सुमारास उघडकीस आली आहे.
अशोक डुंभडे (वय.५०) असे मृत्यू झालेल्या व्यक्तीचे नाव असल्याची प्राथमिक माहिती समोर येत आहे.
मिळालेल्या माहितीनुसार, विकी शेंडकर यांची माळी मळा परिसरातील मारुती मंदिराजवळ एक इमारत आहे. शेंडकर यांनी हॉटेलमध्ये काम करणाऱ्या एका व्यक्तीला भाडेतत्त्वावर रूम भाड्याने दिली होती. शेंडकर यांच्या भाडेकरूकडे त्याचे नातेवाईक अशोक डुंभडे हे आले होते. नातेवाईक घरी आहेत म्हणून शेंडकर यांचे भाडेकरू तीन दिवसांपासून कामानिमित्त बाहेर गावी गेले होते.
दरम्यान, दोन दिवस झाले तरी घराचा दरवाजा उघडला नाही. आवाज दिला तरी कोणीही प्रतिसाद दिला नाही. म्हणून शेंडकर यांनी या घटनेची माहिती लोणी काळभोर पोलिसांना दिली.
या घटनेची माहिती मिळताच, लोणी काळभोर पोलीस ठाण्याचे सहाय्यक पोलीस निरीक्षक सोमनाथ नाळे, सहाय्यक फौजदार विनोद कांबळे, पोलिस हवालदार तेजस जगदाळे, हणमंत शिंगाडे व त्यांचे सहकारी तातडीने घटनास्थळी दाखल झाले. पोलिसांनी नागरिकांच्या मदतीने घराचा दरवाजा तोडला असता, अशोक डुंभडे यांचा मृतदेह अर्धनग्न अवस्थेत आढळून आला.
पोलिसांनी अशोक डुंभडे याचा मृतदेह ताब्यात घेऊन महाराजा रुग्णवाहिकेच्या मदतीने पुण्यातील ससून रुग्णालयात सर्व शवविच्छेदनासाठी पाठविला आहे. शवविच्छेदनाचा अहवाल आल्यानंतर मृत्यूचे खरे कारण समोर येईल. मृतदेहाची प्राथमिक ओळख पटली असली तरी पडताळणी करून योग्य ओळख पटविण्याचे पोलिसांसमोर आव्हान उभे आहे. तरी पुढील तपास लोणी काळभोर पोलीस करीत आहेत.
