Facebookवर ‘रशियन’ तरुणीची फ्रेंड रिक्वेस्ट; गोड बोलून जाळ्यात ओढलं, नालासोपाऱ्यातील 56 वर्षीय व्यक्तीला 7 लाखांचा गंडा
नालासोपारा : सोशल मीडियावर अनोळखी व्यक्तींशी मैत्री करताना किती मोठी किंमत मोजावी लागू शकते, याचे धक्कादायक उदाहरण नालासोपाऱ्यात समोर आले आहे. फेसबुकवर स्वतःला रशियन तरुणी असल्याचे सांगणाऱ्या सायबर भामट्याने 56 वर्षीय व्यक्तीला प्रेमळ संवाद आणि भावनिक गोष्टींमध्ये गुंतवून तब्बल 7 लाख 38 हजार 500 रुपयांची फसवणूक केल्याचा प्रकार उघड झाला आहे. या प्रकरणामुळे पुन्हा एकदा सोशल मीडिया फ्रॉडचा गंभीर चेहरा समोर आला असून पोलीस नागरिकांना सतर्क राहण्याचे आवाहन करत आहेत.
पोलिसांकडून मिळालेल्या माहितीनुसार, नालासोपाऱ्यात राहणाऱ्या 56 वर्षीय व्यक्तीला फेब्रुवारी महिन्यात फेसबुकवर एका अज्ञात महिलेची फ्रेंड रिक्वेस्ट आली होती. सुरुवातीला साध्या गप्पांपासून सुरू झालेला संवाद काही दिवसांतच अधिक जवळीक निर्माण करणारा बनला. संबंधित महिलेने स्वतःला रशियाची नागरिक असल्याचे सांगत भारतात येत असल्याचा दावा केला.
काही दिवसांनी तिने आपण दिल्लीतील आंतरराष्ट्रीय विमानतळावर पोहोचल्याचे सांगितले. मात्र, आपल्याकडे मौल्यवान वस्तू आणि महत्त्वाची कागदपत्रे असल्याने कस्टम विभागाने अडवून ठेवल्याचे कारण सांगत तातडीने आर्थिक मदतीची मागणी केली. कस्टमची प्रक्रिया पूर्ण होताच संपूर्ण रक्कम परत देण्याचे आश्वासनही तिने दिले.
महिलेच्या बोलण्यावर विश्वास ठेवून तक्रारदाराने तिच्या सांगण्यानुसार विविध बँक खात्यांमध्ये टप्प्याटप्प्याने ₹7.38 लाखांहून अधिक रक्कम ऑनलाइन हस्तांतरित केली. पैसे मिळाल्यानंतर मात्र संबंधित महिलेने अचानक फोन, फेसबुक आणि इतर सर्व संपर्क माध्यमे बंद केली. वारंवार संपर्क करण्याचा प्रयत्न करूनही प्रतिसाद न मिळाल्याने आपली फसवणूक झाल्याचे तक्रारदाराच्या लक्षात आले.
यानंतर त्यांनी वालीव पोलीस ठाण्यात धाव घेत तक्रार दाखल केली. पोलिसांनी अज्ञात आरोपीविरुद्ध फसवणुकीचा गुन्हा दाखल केला असून, सायबर तज्ज्ञांच्या मदतीने पैसे ज्या खात्यांमध्ये जमा झाले त्यांचा माग काढण्याचे काम सुरू आहे. आरोपीने बनावट ओळख वापरून फसवणूक केल्याचा प्राथमिक संशय व्यक्त करण्यात आला आहे.
- दरम्यान, अशा प्रकारच्या फसवणुकीत परदेशी नागरिक, कस्टम अधिकारी, कुरिअर कंपनी किंवा विमानतळ प्रशासनाच्या नावाचा वापर करून नागरिकांकडून पैसे उकळले जात असल्याचे सायबर पोलिसांनी सांगितले. सोशल मीडियावर झालेल्या ओळखीवर लगेच विश्वास ठेवू नये, अनोळखी व्यक्तीने कोणत्याही कारणासाठी पैशांची मागणी केल्यास ती रक्कम पाठवू नये आणि संशयास्पद प्रकार आढळल्यास त्वरित सायबर हेल्पलाइन किंवा जवळच्या पोलीस ठाण्याशी संपर्क साधावा, असे आवाहन करण्यात आले आहे.
या घटनेमुळे सोशल मीडियावरील बनावट प्रोफाइलच्या माध्यमातून होणाऱ्या आर्थिक फसवणुकीचा धोका पुन्हा अधोरेखित झाला असून, नागरिकांनी ऑनलाइन व्यवहार करताना अधिक सतर्क राहण्याची गरज असल्याचे स्पष्ट झाले आहे.
