काय सांगता! ९६ लाखांच्या बदल्यात दोन हजारांच्या नोटेचे एक कोटी बदलून घ्या, जाणून घ्या काय आहे प्रकरण
मुंबई : आमच्याकडे दोन हजारांच्या नोटा आहेत, ती रक्कम एक कोटी इतकी असून त्या बदल्यात ९६ लाख रुपये द्या, या व्यवहारात चार लाखांचा फायदा आहे असे सांगत उस्मानाबादच्या व्यापाऱ्याला गंडा घालण्याचा प्रयत्न करण्यात आला.
ही घटना लातूरमध्ये घडली असून या व्यापाऱ्याकडून ९६ लाख रुपये घेतल्याची माहिती समोर आली. पोलिसांकडे केलेल्या तक्रारीनंतर या प्रकरणी आठ जणांना ताब्यात घेण्यात आले आहे.
बालाजी एकनाथ कोयले (वय. ३८) रा. सुरूराजपूर, ता. शिरूरअनंतपाळ, जि. लातूर सध्या राहणार श्रीनगर, लातूर, किशोर आत्माराम माने (वय. ३२) रा. चाडगाव, ता. रेणापूर, जि. लातूर, मेघशाम शिवाजी पांचाळ (वय. ३५) रा. चव्हाणवाडी, ता. गेवराई, जि. बीड, बालाजी लिंबाजीराव रसाळकर (वय. ४५) रा. विजापूर नाका, सोलापूर, शाम प्रल्हाद घेगरदरे (वय. ६२) रा. लिलावती सदन, ओनर्कनगर, विजापूर रोड, सोलापूर, इमाम अहमद शेख (वय. ४०) रा. भोकरंबा, ता. रेणापूर, जि. लातूर, संदीप जयंत शिवणीकर (वय. ३७) रा. कोस्टल कॉलनी, होडगी रोड, सोलापूर व इतर २ विरूद्ध एमआयडीसी पोलिस ठाण्यात गुन्हा दाखल करण्यात आला असून फरार आरोपींचा शोध सुरू आहे.
मिळालेल्या माहिती नुसार, दोन हजार रुपयांच्या नोटा चलनातून बंद होणार आहेत. यामुळे नोटा बदलून घेण्याचा मोठा व्यवहार होत आहे. उस्मानाबाद जिल्ह्यातील व्यापारी अजिंक्य देवडा यांना काही दिवसांपूर्वी एका ओळखीच्या व्यक्तीने फोन केला.
आमच्याकडे लातूर येथील एका व्यक्तीस दोन हजाराच्या नोटा बदलून हव्या आहेत. तुम्ही मोठे व्यापारी आहात. दोन हजारांच्या एक कोटीच्या नोटा आम्ही तुम्हास देतो, तुम्ही आम्हाला फक्त ९६ लाख रुपये द्या. या व्यवहारात तुमचा चार लाखांचा फायदा आहे. या आमिषाला बळी पडत देवडा यांनी ९६ लाख रुपये गोळा केले, यात दोनशे आणि पाचशेच्या नोटा होत्या.
लातूर येथील एमआयडीसी परिसरातील एका गोदामात हा सर्व व्यवहार होणार होता. लातूर सोलापूर आणि बीड भागातील आठ जणांच्या टोळीने हे कृत्य केले होते. त्यांनी या भागात देवडा यांना बोलावून फसवण्याचे ठरवले होते. मात्र पोलिसांना या बाबत गुप्त बातमीदाराकडून माहिती मिळाली. पोलिसांनी घटनास्थळी दाखल होत दोन गाड्या आणि ९६ लाख रुपये ताब्यात घेतले.
सदर घटनेची संपूर्ण माहिती घेतल्यानंतर त्यांना सत्य परिस्थिती लक्षात आली. उस्मानाबाद जिल्ह्यातील व्यापारी अजिंक्य देवडा यांच्या फिर्यादीवरून लातूर सोलापूर बीड आणि उस्मानाबाद या भागातील आठ जणांच्या विरोधात गुन्हा दाखल करण्यात आला आहे. दोन हजार रुपयाच्या नोटा देतो म्हणून फसवून लुबाडणाच्या उद्देशाने सर्व सापळा रचणारे गजाआड झाले आहेत.
