वाहनचालकांसाठी सरकारचा मोठा निर्णय! थकीत ई-चलनाच्या दंडातून मिळणार दिलासा; काय आहे नवी योजना?
मुंबई : राज्यातील वाहनधारकांसाठी महत्त्वाची बातमी आहे. वाहतूक नियमांचे उल्लंघन केल्यामुळे वाहनांवर आकारण्यात आलेल्या थकीत ई-चलनाच्या दंडातून आता वाहनचालकांना काही प्रमाणात दिलासा मिळणार आहे. महायुती सरकारने प्रलंबित ई-चलनाच्या दंडासाठी अभय योजना लागू करण्याचा निर्णय घेतला आहे. राज्य मंत्रिमंडळाच्या बैठकीत या योजनेला मंजुरी देण्यात आली.
थकीत दंडावर मिळणार २० टक्क्यांपर्यंत सवलत
सरकारच्या निर्णयानुसार, वाहतूक नियमभंगामुळे आकारण्यात आलेल्या आणि अद्याप न भरलेल्या दंडाच्या रकमेवर एकदाच २० टक्क्यांपर्यंत सवलत दिली जाणार आहे. त्यामुळे अनेक दिवसांपासून प्रलंबित असलेले ई-चलन भरणाऱ्या वाहनधारकांना आर्थिक दिलासा मिळू शकतो. एकापेक्षा अधिक चलनांची थकबाकी असलेल्या वाहनधारकांसाठीही ही योजना महत्त्वाची ठरणार आहे.
योजनेचे नाव काय?
या योजनेचे नाव ‘महाराष्ट्र वाहतूक पोलीस चलन अभय योजना २०२६’ असे आहे. वाहतूक नियमांचे उल्लंघन केल्यानंतर आकारण्यात आलेला दंड वेळेत न भरल्यामुळे अनेक वाहनधारकांकडे मोठी थकबाकी जमा झाली आहे. ही थकबाकी कमी करून प्रलंबित दंडाचा निपटारा करण्यासाठी सरकारने ही सवलत देण्याचा निर्णय घेतला आहे.
योजनेचा लाभ कसा मिळणार?
ही सवलत एकवेळची असणार आहे. त्यामुळे वाहनधारकांना प्रलंबित चलनांचा भरणा करून दंडाची थकबाकी कमी करण्याची संधी मिळणार आहे. मात्र, कोणत्या प्रकारच्या चलनांना ही सवलत लागू असेल, लाभ घेण्यासाठी अर्ज किंवा ऑनलाइन प्रक्रिया काय असेल आणि योजना नेमकी कधीपासून सुरू होणार, याबाबतची सविस्तर माहिती अद्याप स्पष्ट होणे अपेक्षित आहे.
त्यामुळे थकीत ई-चलन असलेल्या वाहनधारकांचे या योजनेच्या अंमलबजावणीकडे लक्ष लागले आहे. सरकारकडून अधिकृत मार्गदर्शक सूचना जाहीर झाल्यानंतर योजनेचा लाभ घेण्याची प्रक्रिया स्पष्ट होणार आहे.
