एकाच घरात दोन गॅस कनेक्शन घेण्याचा विचार करताय? घरमालकांसह भाडेकरूंनीही लक्षात ठेवा ‘हा’ नियम; कागदपत्रांत चूक झाल्यास अडचण!
पुणे : घरात आधीच गॅस जोडणी असताना दुसरे कनेक्शन घेता येते का? घरमालक आणि भाडेकरू एकाच छताखाली राहत असतील, तर हा प्रश्न अनेकांना पडतो. विशेषतः दोन्ही कुटुंबांचा स्वयंपाक स्वतंत्र असेल, तर वेगळी गॅस जोडणी घेण्याची गरज भासते. मात्र, एकाच पत्त्यावर दोन गॅस जोडण्या मिळवण्यासाठी नेमके कोणते नियम लागू होतात आणि कोणती कागदपत्रे आवश्यक असतात, हे जाणून घेणे महत्त्वाचे आहे.
स्वतंत्र कुटुंब असल्याचा पुरावा आवश्यक
एकाच घरात दोन स्वतंत्र कुटुंबे राहत असल्यास दुसऱ्या गॅस जोडणीसाठी त्यांच्या स्वतंत्र निवासाची आणि स्वयंपाकाच्या व्यवस्थेची माहिती महत्त्वाची ठरू शकते. स्वतंत्र शिधापत्रिका, पत्त्याचा पुरावा आणि स्वतंत्र स्वयंपाकघरासंबंधीची माहिती मागितली जाऊ शकते. मात्र, केवळ वेगळे शिधापत्रिका कार्ड असल्याने दुसरी जोडणी मंजूर होईलच, असे नाही. अर्जदाराची परिस्थिती आणि संबंधित गॅस कंपनीचे नियम यानुसार निर्णय घेतला जातो.
भाडेकरूंनी कोणती कागदपत्रे तयार ठेवावीत?
दुसऱ्या गॅस जोडणीसाठी अर्ज करणाऱ्या व्यक्तीचे वय किमान १८ वर्षे असणे आवश्यक असते. ओळख पटवण्यासाठी आधार कार्ड किंवा मान्यताप्राप्त अन्य ओळखपत्र आणि पत्त्याचा पुरावा द्यावा लागू शकतो. भाडेकरूंना भाडेकरार किंवा निवासाचा पुरावा सादर करण्याची आवश्यकता भासू शकते. स्वतंत्र कुटुंब असल्याचे सिद्ध करणारी अतिरिक्त कागदपत्रेही संबंधित वितरक मागू शकतो.
एकाच पत्त्यावर आधीच जोडणी असल्यास काय?
घरात आधीपासून गॅस जोडणी असल्यास नवीन अर्जाची पडताळणी केली जाऊ शकते. गरजेनुसार गॅस वितरक अतिरिक्त कागदपत्रे मागवू शकतो किंवा निवास आणि स्वयंपाकाच्या व्यवस्थेबाबत अधिक माहिती घेऊ शकतो. त्यामुळे अर्जात अचूक माहिती देणे आणि आवश्यक कागदपत्रे पूर्ण ठेवणे महत्त्वाचे आहे.
केवायसीतील चुकीमुळे अर्ज रखडू शकतो!
ग्राहकाची ओळख आणि पत्ता पडताळण्यासाठी केवायसी प्रक्रिया महत्त्वाची असते. अर्जातील माहिती आणि सादर केलेल्या कागदपत्रांमध्ये तफावत असल्यास मंजुरीला विलंब होऊ शकतो किंवा अर्ज नाकारला जाऊ शकतो. गॅस जोडणी घेतल्यानंतर सुरक्षिततेसाठी भारतीय मानक ब्युरोचे मानांकन असलेली शेगडी आणि योग्य गॅस नळी वापरणेही आवश्यक आहे.
एकाच कुटुंबासाठी मात्र नियम वेगळे!
घरगुती गॅस जोडण्यांबाबत एकाच कुटुंबाला एकापेक्षा अधिक जोडण्या देण्यावर सर्वसाधारणपणे निर्बंध आहेत. मात्र, एकाच पत्त्यावर राहणारी दोन स्वतंत्र कुटुंबे आणि एकाच कुटुंबाच्या नावावर असलेल्या अनेक जोडण्या या वेगळ्या परिस्थिती आहेत. त्यामुळे दुसऱ्या जोडणीसाठी अर्ज करण्यापूर्वी संबंधित गॅस वितरकाकडून पात्रता, लागू नियम आणि आवश्यक कागदपत्रांची खात्री करून घ्यावी. केवळ एकाच घरात दोन कुटुंबे राहत असल्याने दुसरे कनेक्शन आपोआप मंजूर होत नाही.
