नागपूर पदवीधर निवडणुकीच्या तोंडावर शरद पवारांचा मोठा निर्णय! नितेश कराळे मास्तरांची पक्षातून हकालपट्टी
मुंबई : विधान परिषद निवडणुकीच्या रणधुमाळीत राष्ट्रवादी काँग्रेस शरदचंद्र पवार पक्षाने नितेश कराळे गुरुजी यांच्याविरोधात कारवाई केली आहे. नागपूर पदवीधर मतदारसंघातून अपक्ष उमेदवारी अर्ज कायम ठेवल्यामुळे कराळे मास्तर यांची पक्षातून हकालपट्टी करण्यात आली आहे. निवडणुकीच्या मतदानाच्या आदल्या दिवशी घडलेल्या या राजकीय घडामोडीमुळे नागपूरमधील लढतीकडे लक्ष वेधले गेले आहे.
अधिकृत उमेदवाराला आव्हान; कराळेंचा अर्ज कायम
नागपूर पदवीधर मतदारसंघातून महाविकास आघाडीने अभिजीत वंजारी यांना अधिकृत उमेदवारी दिली आहे. मात्र, नितेश कराळे गुरुजी यांनी आपला अपक्ष उमेदवारी अर्ज मागे न घेता निवडणुकीच्या रिंगणात कायम राहण्याचा निर्णय घेतला. त्यामुळे आघाडीच्या अधिकृत उमेदवारासमोरच आव्हान उभे राहिले. पक्षाच्या भूमिकेविरोधात उमेदवारी कायम ठेवल्याने राष्ट्रवादी काँग्रेस शरदचंद्र पवार पक्षाकडून त्यांच्यावर कारवाई करण्यात आली.
विधान परिषदेच्या पाच जागांसाठी उद्या मतदान
राज्यात विधान परिषदेच्या पाच जागांसाठी २३ ऑक्टोबर रोजी मतदान होणार असून, २७ ऑक्टोबरला मतमोजणी होणार आहे. यामध्ये नागपूर पदवीधर, पुणे पदवीधर, पुणे शिक्षक, मराठवाडा पदवीधर आणि अमरावती शिक्षक या मतदारसंघांचा समावेश आहे. तीन पदवीधर आणि दोन शिक्षक मतदारसंघांसाठी ही निवडणूक होत आहे.
या निवडणुकीत महायुती आणि महाविकास आघाडीने आपली ताकद पणाला लावली आहे. मात्र, काही मतदारसंघांमध्ये उमेदवारीवरून आघाड्यांमध्येच मतभेद आणि बंडखोरीचे चित्र दिसत आहे.
मराठवाडा आणि अमरावतीतही उमेदवारीवरून पेच
मराठवाडा पदवीधर मतदारसंघात महाविकास आघाडीतील राष्ट्रवादी काँग्रेस शरदचंद्र पवार पक्ष आणि शिवसेना उद्धव बाळासाहेब ठाकरे पक्षाने स्वतंत्र उमेदवार दिल्याने राजकीय समीकरणे गुंतागुंतीची झाली आहेत. अमरावती शिक्षक मतदारसंघातही दोन्ही पक्षांचे उमेदवार रिंगणात असल्याचे वृत्त आहे.
त्यामुळे नागपूरमधील कराळे मास्तरांची उमेदवारी आणि पक्षातून झालेली हकालपट्टी यासह इतर मतदारसंघांतील बंडखोरीचा निवडणुकीवर काय परिणाम होतो, याकडे राजकीय वर्तुळाचे लक्ष लागले आहे. आता २३ ऑक्टोबरच्या मतदानानंतर २७ ऑक्टोबरला जाहीर होणाऱ्या निकालातून मतदारांचा कौल स्पष्ट होणार आहे.
