दिवाळीत गावी जाणाऱ्यांसाठी मोठी बातमी! पुण्यातून ६०० हून अधिक विशेष एसटी बस, बुकिंग कधी आणि कुठे कराल?
पुणे : दिवाळीचा सण जवळ येताच नोकरी, शिक्षण आणि व्यवसायानिमित्त पुण्यात राहणाऱ्या नागरिकांची गावी जाण्यासाठी लगबग सुरू झाली आहे. सणासाठी मोठ्या संख्येने प्रवासी गावी जात असल्याने रेल्वे आणि एसटी बसच्या आरक्षणाला मोठी मागणी आहे.
अनेक नियमित बसचे आरक्षण आतापासूनच पूर्ण होऊ लागले आहे. त्यामुळे प्रवाशांची गैरसोय टाळण्यासाठी महाराष्ट्र राज्य मार्ग परिवहन महामंडळाच्या (एसटी) पुणे विभागाने महत्त्वाचा निर्णय घेतला आहे. दिवाळीच्या काळात पुण्यातून ६०० हून अधिक विशेष बस सोडण्याचे नियोजन करण्यात आले आहे.
४ ते ७ नोव्हेंबरदरम्यान विशेष बस धावणार
दिवाळीनिमित्त प्रवाशांची वाढती गर्दी लक्षात घेऊन ४ ते ७ नोव्हेंबरदरम्यान पिंपरी-चिंचवड, स्वारगेट आणि शिवाजीनगर येथून जादा बस सोडण्यात येणार आहेत. मराठवाडा, विदर्भ, खानदेश आणि पश्चिम महाराष्ट्रात जाणाऱ्या प्रवाशांसाठी या बस उपलब्ध असतील. नियमित बसचे आरक्षण फुल होत असल्याने विशेष बसमुळे प्रवाशांना मोठा दिलासा मिळण्याची अपेक्षा आहे.
सणाच्या काळात रेल्वेगाड्यांचे आरक्षण पूर्ण झाल्याने एसटी बसवर प्रवाशांचा भार वाढण्याची शक्यता आहे. ही परिस्थिती लक्षात घेऊन नियमित बससेवेसोबतच अतिरिक्त गाड्या चालवण्याचे नियोजन एसटी प्रशासनाने केले आहे.
पिंपरी-चिंचवडमधून ४०० हून अधिक बस
यंदा मराठवाडा, विदर्भ आणि खानदेशात जाणाऱ्या प्रवाशांसाठी पिंपरी-चिंचवड आगारातून विशेष बस सोडण्याचे नियोजन करण्यात आले आहे. यापूर्वी या मार्गांवरील जादा बस खडकी कॅन्टोन्मेंट परिसरातून सोडण्यात येत होत्या. मात्र, तेथील जागेची अडचण लक्षात घेऊन एसटी प्रशासनाकडून पर्यायी जागेचा शोध घेण्यात आला.
आता पिंपरी-चिंचवड आगारातून ४ ते ७ नोव्हेंबरदरम्यान ४०० हून अधिक विशेष बस सोडण्यात येणार आहेत. बसच्या पार्किंगसाठी जवळचे मैदान भाडेतत्त्वावर घेण्यात आले आहे. नियोजित वेळापत्रकानुसार या बस सोडण्यात येणार असल्याची माहिती एसटी प्रशासनाकडून देण्यात आली आहे.
स्वारगेटमधून २०० जादा बस; या जिल्ह्यांना फायदा
पश्चिम महाराष्ट्र आणि कोकणात जाणाऱ्या प्रवाशांसाठी स्वारगेट बसस्थानकातून नियमित गाड्यांव्यतिरिक्त २०० जादा बस सोडण्याचे नियोजन करण्यात आले आहे. सातारा, सांगली, कोल्हापूर, सोलापूर आणि कोकणात जाणाऱ्या प्रवाशांना याचा फायदा होणार आहे. शिवाजीनगर बसस्थानकातूनही विशेष बस सोडण्यात येणार आहेत.
प्रवाशांची गर्दी नियंत्रित करण्यासाठी आणि बसस्थानकांवर गोंधळ होऊ नये, यासाठी एसटी प्रशासनाकडून आवश्यक नियोजन केले जात आहे. विशेष बस सुरू झाल्यामुळे दिवाळीसाठी गावी जाणाऱ्या नागरिकांना प्रवासाचे अधिक पर्याय उपलब्ध होणार आहेत.
८५ नियमित बसचे आरक्षण फुल
पुणे विभागातून विदर्भ, मराठवाडा आणि पश्चिम महाराष्ट्रात जाणाऱ्या ८५ हून अधिक नियमित बसचे आरक्षण आतापर्यंत पूर्ण झाले आहे. यामध्ये विदर्भातील ४०, मराठवाड्यातील ३५ आणि पश्चिम महाराष्ट्रातील १० बसचा समावेश आहे. प्रवाशांची वाढती मागणी लक्षात घेऊन संबंधित आगारांमार्फत अतिरिक्त बसचे नियोजन करण्यात आले आहे. या व्यवस्थेसाठी अधिकाऱ्यांची नियुक्तीही करण्यात आली आहे.
विशेष बसचे बुकिंग कधी सुरू होणार?
एसटी महामंडळाच्या विशेष बसचे ऑनलाइन आरक्षण येत्या दोन दिवसांत सुरू होणार असल्याची माहिती देण्यात आली आहे. प्रवाशांना एसटी महामंडळाच्या अधिकृत संकेतस्थळावरून किंवा मोबाइल ॲपद्वारे तिकीट आरक्षित करता येणार आहे. तसेच अधिकृत तिकीट आरक्षण केंद्रांवरही बुकिंगची सुविधा उपलब्ध असेल.
दिवाळीच्या काळात गावी जाण्याचे नियोजन करणाऱ्या प्रवाशांनी आरक्षण सुरू झाल्यानंतर लवकर तिकीट बुक करावे, जेणेकरून ऐनवेळी होणारी धावपळ टाळता येईल.
