ज्वारीच्या शेतात पत्नीचा रक्ताने माखलेला मृतदेह! हत्येनंतर इंजिनिअर पतीचे WhatsApp स्टेटस चर्चेत; चिमुकल्याने दाखवली आईची मृतदेहाची जागा

धाराशिव : धाराशिव जिल्ह्यातील कळंब-येरमाळा मार्गावरील हासेगाव शिवारात घडलेल्या एका भीषण हत्याकांडाने परिसरात खळबळ उडाली आहे. पत्नीच्या चारित्र्यावर संशय घेत पतीनेच तिची दगडाने ठेचून हत्या केल्याचा आरोप आहे. धक्कादायक म्हणजे, अवघ्या चार वर्षांच्या मुलासमोर हा प्रकार घडला. पत्नीची हत्या केल्यानंतर आरोपी पतीने व्हॉट्सॲपवर ठेवलेल्या स्टेटसमुळे या घटनेची चर्चा अधिकच रंगली आहे. या प्रकरणात आता पोलीस आरोपीचा शोध घेत आहेत.

संशयाचे रूपांतर हिंसाचारात; पत्नीला शेतात नेले

मिळालेल्या माहितीनुसार, गणेश शिवाजी टेकाळे हा सावकारगावचा रहिवासी असून तो अभियंता आहे. तो बेरोजगार होता आणि नशेच्या आहारी गेल्याची माहिती समोर आली आहे. पत्नी कोमल हिच्या चारित्र्यावर त्याला सतत संशय असल्याने दोघांमध्ये वारंवार वाद होत असल्याचे सांगितले जाते.

हत्येपूर्वी गणेशने पत्नीचा एक व्हिडिओ तयार करून नातेवाईकांना पाठवला होता. त्यामुळे दोघांमधील वाद अधिकच वाढल्याची माहिती आहे. बुधवारी सायंकाळी गणेश पत्नी कोमल आणि चार वर्षांच्या मुलाला दुचाकीवरून हासेगाव येथील शेतात घेऊन गेला. तिथे पुन्हा वाद विकोपाला गेल्यानंतर त्याने कोमलला मारहाण केली आणि दगडाने ठेचून तिची हत्या केल्याचा आरोप आहे.

हत्येनंतर स्टेटसवर नेमकं काय लिहिलं?

पत्नीची हत्या केल्यानंतर गणेशने व्हॉट्सॲप स्टेटसवर विश्वासघाताचा उल्लेख करत तिला शिक्षा दिल्याच्या आशयाचा मजकूर लिहिला. तसेच, स्वतःच्या मागावर येणाऱ्यांनी स्मशानभूमीत भेटावे, असा मजकूरही त्याने स्टेटसमध्ये टाकल्याची माहिती आहे. त्यानंतर आरोपी घटनास्थळावरून पसार झाला. या स्टेटसमुळे तपासात डिजिटल पुराव्यांना महत्त्व प्राप्त झाले आहे.

चिमुकल्याने दाखवली आईच्या मृतदेहाची जागा

घटनेची माहिती मिळताच पोलिसांनी घटनास्थळी धाव घेतली. या प्रकरणातील सर्वांत हृदयद्रावक बाब म्हणजे, अवघ्या चार वर्षांच्या मुलाने पोलिसांना आईचा मृतदेह कुठे आहे, हे दाखवले. ज्या वयात मुलाला आईच्या मायेची सर्वाधिक गरज असते, त्याच वयात त्याच्यावर हा मोठा आघात झाला आहे.

मोबाईल, व्हिडिओ आणि स्टेटसची तपासणी

पोलिसांनी फॉरेन्सिक पथकाच्या मदतीने घटनास्थळावरून आवश्यक पुरावे गोळा केले आहेत. आरोपीचा मोबाईल, व्हॉट्सॲप स्टेटस आणि नातेवाईकांना पाठवलेला व्हिडिओ तपासाच्या कक्षेत आहे. या डिजिटल पुराव्यांमधून हत्येपूर्वीचा घटनाक्रम आणि वादाची पार्श्वभूमी स्पष्ट होण्यास मदत होऊ शकते.

दरम्यान, पत्नीच्या हत्येनंतर फरार झालेल्या गणेशचा पोलीस शोध घेत आहेत. या घटनेमुळे परिसरात हळहळ व्यक्त होत असून, एका चिमुकल्याच्या डोळ्यांसमोर त्याचे कुटुंब उद्ध्वस्त झाल्याची वेदनादायी परिस्थिती निर्माण झाली आहे. प्रकरणाचा पुढील तपास सुरू आहे.