शरद पवारांची ‘या, आमच्यासोबत या’ खुली ऑफर; सुनेत्रा पवार गटाकडून विलीनीकरणावर पहिली प्रतिक्रिया, अनिल पाटील म्हणाले, “आम्ही आता…”
मुंबई : राष्ट्रवादी काँग्रेसच्या दोन्ही गटांच्या संभाव्य विलीनीकरणाच्या चर्चांना शरद पवारांच्या एका वक्तव्याने पुन्हा उधाण आलं आहे. “आम्ही कुणासोबत जाणार नाही, कुणाला यायचं असेल तर आमच्यासोबत या,” अशी भूमिका शरद पवारांनी मांडली. त्यांच्या या वक्तव्यानंतर सुनेत्रा पवार यांच्या नेतृत्वाखालील राष्ट्रवादी काँग्रेसकडून मंत्री अनिल पाटील यांनी पहिली प्रतिक्रिया दिली आहे.
“विलीनीकरणाची चर्चाच नाही”
अनिल पाटील यांनी दोन्ही राष्ट्रवादी काँग्रेसच्या विलीनीकरणाची शक्यता स्पष्टपणे फेटाळली. शरद पवार राष्ट्रीय नेते आहेत आणि त्यांनी त्यांच्या पक्षात येण्याचं आवाहन केलं असेल; मात्र आमच्या पक्षात विलीनीकरणाबाबत कोणत्याही पातळीवर चर्चा झालेली नाही, असं पाटील यांनी स्पष्ट केलं.
त्यांनी सांगितलं की, “विलीनीकरणाच्या विषयाला पूर्णविराम दिला पाहिजे. आमच्या पक्षाचं काम स्वतंत्रपणे सुरू आहे. आम्ही विलीनीकरणासाठी जाणार नाही. आमच्यापर्यंत किंवा पक्षश्रेष्ठींपर्यंत याबाबत कोणतीही चर्चा झालेली नाही.”
एनडीएच्या चर्चेवरही अनिल पाटीलांचं स्पष्ट उत्तर
शरद पवार एनडीएमध्ये सहभागी होणार असल्याच्या चर्चांवरही अनिल पाटील यांनी भाष्य केलं. एनडीएच्या प्रमुख नेत्यांसोबत शरद पवारांची काही चर्चा झाली आहे किंवा नाही, याचं उत्तर शरद पवारच देऊ शकतात, असं त्यांनी म्हटलं.
आपल्यासोबत किंवा आपल्या पक्षासमोर एनडीएमध्ये जाण्याबाबत कोणतीही चर्चा झालेली नसल्याचं पाटील यांनी स्पष्ट केलं. त्यामुळे राष्ट्रवादीच्या दोन्ही गटांमध्ये भविष्यात विलीनीकरण होणार असल्याच्या चर्चांवर सध्या कोणताही अधिकृत निर्णय झालेला नसल्याचं त्यांच्या प्रतिक्रियेतून समोर आलं.
अजित पवारांच्या निधनानंतर पुन्हा चर्चांना वेग
राष्ट्रवादी काँग्रेसमध्ये फूट पडल्यानंतर दोन स्वतंत्र गट निर्माण झाले आहेत. एक गट सत्तेत असून दुसरा विरोधी पक्षाची भूमिका बजावत आहे. अजित पवारांच्या निधनानंतर दोन्ही गट पुन्हा एकत्र येतील, अशी चर्चा राजकीय वर्तुळात सुरू होती. राष्ट्रवादीतील काही नेत्यांनीही दोन्ही गटांनी एकत्र यावं, अशी इच्छा व्यक्त केली होती.
मात्र, शरद पवारांनी आता “आम्ही कुठेही जाणार नाही; यायचं असेल तर आमच्यासोबत या” अशी भूमिका घेतल्याने या चर्चेला नवं वळण मिळालं आहे. त्यांच्या वक्तव्याचा रोख सुनेत्रा पवार यांच्या नेतृत्वाखालील राष्ट्रवादीकडे असल्याची राजकीय चर्चा सुरू झाली आहे.
विलीनीकरणाऐवजी स्वतंत्र वाटचालीचे संकेत
एकीकडे शरद पवारांनी आपली भूमिका स्पष्ट केली, तर दुसरीकडे अनिल पाटील यांनीही विलीनीकरणाची कोणतीही चर्चा झालेली नसल्याचं सांगितलं. त्यामुळे सध्या दोन्ही गटांकडून स्वतंत्रपणे पक्षाचं काम सुरू असल्याचं चित्र आहे.
दरम्यान, राष्ट्रवादी काँग्रेसच्या बैठकीत शरद पवारांनी राज्यातील दुष्काळी परिस्थितीवरही भूमिका मांडली. दुष्काळग्रस्त शेतकरी आणि ग्रामीण भागातील नागरिकांच्या प्रश्नांवर सरकारने तातडीने निर्णय घ्यावा, अशी मागणी त्यांनी केली आहे. दुष्काळाच्या पार्श्वभूमीवर त्यांनी मुख्यमंत्री देवेंद्र फडणवीस यांच्याकडे विशेष अधिवेशनासह विविध मागण्या केल्याचंही समोर आलं आहे.
त्यामुळे शरद पवारांची ‘आमच्यासोबत या’ ही ऑफर आणि त्यावर सुनेत्रा पवार गटाची स्पष्ट भूमिका यामुळे राष्ट्रवादी काँग्रेसच्या दोन्ही गटांमधील पुढील राजकीय समीकरणांकडे आता राज्याचं लक्ष लागलं आहे.
