‘भारत चौथी मोठी अर्थव्यवस्था, तुम्ही इतका माज का दाखवता?’ मौलाना डिझेल यांचा पाक लष्करावर निशाणा

नवी दिल्ली : पाकिस्तानातील जमीयत उलेमा-ए-इस्लाम-फजल चे प्रमुख मौलाना फजलुर रहमान यांनी पाकिस्तानच्या राजकारणातील लष्कराच्या भूमिकेवर पुन्हा एकदा प्रश्न उपस्थित केला आहे.

देशाचे नेतृत्व कोण करणार, याचा निर्णय जनतेने आपल्या मतांच्या माध्यमातून घ्यावा, असे त्यांनी म्हटले. लष्कराने देशाच्या सीमांच्या सुरक्षेची जबाबदारी पार पाडावी आणि राजकीय प्रक्रियेत हस्तक्षेप करू नये, अशी भूमिका त्यांनी मांडली.

फजलुर रहमान यांनी स्पष्ट केले की, आपला विरोध लष्कराला नसून राजकारणातील त्याच्या भूमिकेला आहे. लष्कराचा एक संस्था म्हणून आपण आदर करतो; मात्र राजकीय निर्णयप्रक्रियेत लष्कराचा हस्तक्षेप मान्य नसल्याचे त्यांनी सांगितले.

‘राजकारण करायचं असेल तर गणवेश काढून या’

लष्कराने राजकारणात सक्रिय भूमिका घ्यायची असल्यास त्यांनी गणवेश बाजूला ठेवून निवडणुकीच्या मैदानात यावे, अशी भूमिका फजलुर रहमान यांनी यापूर्वीही मांडली होती. लष्करी हस्तक्षेपामुळे देशातील राजकीय संस्था आणि लोकशाही प्रक्रियेवर परिणाम होत असल्याचा दावा त्यांनी केला आहे.

भारताच्या अर्थव्यवस्थेचा दाखला

पाकिस्तानच्या आर्थिक परिस्थितीवर भाष्य करताना फजलुर रहमान यांनी भारताचे उदाहरण दिले. महागाई आणि आर्थिक अडचणींचा सामना करणाऱ्या पाकिस्तानने आपल्या धोरणांचा पुनर्विचार करण्याची गरज असल्याचे त्यांनी म्हटले. भारत जगातील चौथी सर्वात मोठी अर्थव्यवस्था झाल्याचा संदर्भ देत त्यांनी पाकिस्तानच्या आर्थिक स्थितीवर प्रश्न उपस्थित केले.

मदरशांबाबतही सरकारला इशारा

पाकिस्तानातील धार्मिक मदरशांबाबत सरकारच्या धोरणालाही फजलुर रहमान यांनी विरोध केला. मदरसे बंद करण्याचे किंवा धर्मगुरूंना लक्ष्य करण्याचे प्रयत्न स्वीकारले जाणार नाहीत, अशी भूमिका त्यांनी मांडली. मदरशांचे नियमन आणि नोंदणी हा पाकिस्तानच्या राजकारणातील संवेदनशील मुद्दा राहिला आहे.

सुरक्षा परिस्थितीवरही सवाल

फजलुर रहमान यांनी पाकिस्तानातील सुरक्षाव्यवस्थेवरही प्रश्न उपस्थित केले. खैबर पख्तुनख्वा आणि बलुचिस्तानमधील हिंसाचाराचा तसेच काश्मीरमधील आंदोलनांचा संदर्भ देत त्यांनी सरकारच्या धोरणांवर टीका केली. पाकिस्तानातील राजकीय, आर्थिक आणि कायदा-सुव्यवस्थेच्या संकटांवर संविधान, लोकशाही आणि संसदीय प्रक्रियेतून तोडगा काढण्याची गरज असल्याचे त्यांनी अलीकडील वक्तव्यांमध्येही म्हटले आहे.