ठाकरे गटाला धक्का, पण शिंदे गटाचीही कोंडी? तटकरेंची मोठी खेळी; गोगावले यांच्या विरोधकाची राष्ट्रवादीत एन्ट्री
रायगड : रायगडच्या राजकारणात राष्ट्रवादी काँग्रेस अजित पवार गटाने केलेल्या एका पक्षप्रवेशामुळे नवी राजकीय चर्चा रंगली आहे. शिवसेना ठाकरे गटाचे महाड विधानसभा मतदारसंघातील समन्वयक सोमनाथ ओझर्डे यांनी आपल्या समर्थक आणि काही शिवसेना पदाधिकाऱ्यांसह राष्ट्रवादी काँग्रेसमध्ये प्रवेश केला आहे. राष्ट्रवादीचे नेते सुनील तटकरे यांनी ओझर्डे यांचं पक्षात स्वागत केलं. त्यामुळे ठाकरे गटाला धक्का बसला असला, तरी या प्रवेशाचा थेट परिणाम शिवसेना शिंदे गटाच्या स्थानिक राजकारणावरही होऊ शकतो, अशी चर्चा आहे.
सोमनाथ ओझर्डे हे महाडमध्ये पालकमंत्री आणि शिवसेना शिंदे गटाचे नेते भरत गोगावले यांचे कट्टर राजकीय विरोधक म्हणून ओळखले जातात. त्यामुळे तटकरेंनी गोगावले यांच्या विरोधातील महत्त्वाच्या राजकीय चेहऱ्याला राष्ट्रवादीत आणल्याने या पक्षप्रवेशाला विशेष महत्त्व प्राप्त झालं आहे. महाड मतदारसंघात गोगावले यांना राजकीय शह देण्यासाठी राष्ट्रवादीकडून संघटनात्मक मोर्चेबांधणी सुरू असल्याचं या निमित्ताने बोललं जात आहे.
या पक्षप्रवेशामुळे महाडमधील राजकीय समीकरणं बदलण्याची शक्यता आहे. ओझर्डे यांच्यासोबत शिवसेनेचे पदाधिकारी आणि सहकारीही राष्ट्रवादीत आल्याने पक्षाला स्थानिक पातळीवर संघटन मजबूत करण्यासाठी मदत होऊ शकते. दुसरीकडे, ठाकरे गटाचा महत्त्वाचा स्थानिक पदाधिकारी प्रतिस्पर्धी पक्षात गेल्याने उद्धव ठाकरे यांच्या गटासाठी हा आणखी एक धक्का मानला जात आहे.
रायगडच्या राजकारणात महायुतीतील अंतर्गत मतभेदही सातत्याने चर्चेत राहिले आहेत. शिवसेना शिंदे गटाचे आमदार महेंद्र दळवी हे तटकरे कुटुंबीयांवर सातत्याने निशाणा साधत असल्याने शिवसेना आणि राष्ट्रवादीमधील स्थानिक राजकीय संघर्ष अनेकदा समोर आला आहे. आता गोगावले यांचे विरोधक असलेल्या ओझर्डे यांना तटकरेंनी आपल्या गटात घेतल्याने या संघर्षाला नवा रंग मिळाला आहे.
दरम्यान, विधानसभा निवडणुकीनंतर ठाकरे गटातील अनेक नेत्यांनी महायुतीतील घटक पक्षांची वाट धरली. नुकत्याच झालेल्या ‘ऑपरेशन टायगर’मध्ये ठाकरे गटाच्या नऊपैकी सहा खासदारांनी शिंदे गटात प्रवेश केल्याने उद्धव ठाकरे यांच्या पक्षाला मोठा धक्का बसला होता. त्यानंतर आता महाडमधील या पक्षप्रवेशामुळे स्थानिक संघटनेलाही हादरा बसला आहे.
मात्र, या घडामोडीचं महत्त्व केवळ ठाकरे गटाला बसलेल्या धक्क्यापुरतं मर्यादित नाही. भरत गोगावले यांचे विरोधक असलेले ओझर्डे आता राष्ट्रवादीच्या गोटात गेल्यामुळे महाडमध्ये शिंदे गटासमोरही नवं राजकीय आव्हान उभं राहण्याची शक्यता आहे. त्यामुळे तटकरेंच्या या खेळीमुळे ठाकरे गटाची ताकद कमी झाली की शिंदे गटाची डोकेदुखी वाढली, याची चर्चा आता रायगडच्या राजकीय वर्तुळात रंगली आहे.
