जरांगेंच्या आरोपांच्या धुरळ्यात बावनकुळेंचा ‘जॅकपॉट’! भाजपने दिलं राजस्थान जिंकण्याचं मिशन
मुंबई : महाराष्ट्रात मराठा आरक्षण, कुणबी नोंदी आणि मनोज जरांगे पाटील यांच्या आरोपांमुळे महसूल मंत्री चंद्रशेखर बावनकुळे गेल्या काही दिवसांपासून चर्चेच्या केंद्रस्थानी आहेत. मात्र या राजकीय गदारोळात भाजपच्या केंद्रीय नेतृत्वाने त्यांच्यावर मोठा विश्वास दाखवत राजस्थानमधील आगामी स्थानिक स्वराज्य संस्थांच्या निवडणुकांसाठी महत्त्वाची जबाबदारी सोपवली आहे. त्यामुळे राज्यातील वादाच्या पार्श्वभूमीवर बावनकुळेंचे पक्षातील राजकीय महत्त्व आणखी वाढल्याची चर्चा सुरू झाली आहे.
राजस्थानमध्ये येत्या काही महिन्यांत नगरपालिका, नगरपरिषद आणि इतर स्थानिक स्वराज्य संस्थांच्या निवडणुका होणार आहेत. या निवडणुकांना भाजपने विशेष महत्त्व दिले असून संघटनात्मक पातळीवर तयारीला वेग देण्यात आला आहे. यासाठी भाजपचे राष्ट्रीय अध्यक्ष नितीन नवीन यांनी प्रभारी आणि सहप्रभारींची घोषणा केली. माजी खासदार हरीश द्विवेदी यांच्याकडे प्रभारीपदाची धुरा देण्यात आली असून चंद्रशेखर बावनकुळे यांच्यासह पाच वरिष्ठ नेत्यांना सहप्रभारी म्हणून नियुक्त करण्यात आले आहे.
भाजपमध्ये संघटन उभारणी आणि निवडणूक व्यवस्थापनातील कुशल नेता म्हणून बावनकुळे यांची ओळख आहे. महाराष्ट्र भाजपचे प्रदेशाध्यक्ष असताना त्यांनी पक्षाची ताकद ग्रामीण भागापासून शहरांपर्यंत वाढवण्यासाठी महत्त्वाची भूमिका बजावली होती. कार्यकर्त्यांशी थेट संपर्क, बूथ व्यवस्थापन आणि निवडणुकीची आखणी यामध्ये त्यांची विशेष पकड मानली जाते. याच अनुभवाच्या बळावर राजस्थानच्या निवडणूक रणांगणात त्यांच्यावर मोठी जबाबदारी टाकण्यात आल्याचे पक्षातील सूत्रांचे म्हणणे आहे.
विशेष बाब म्हणजे, गेल्या काही महिन्यांत राष्ट्रीय नेतृत्वाने बावनकुळेंना वारंवार महत्त्वाच्या जबाबदाऱ्या दिल्या आहेत. मार्च 2026 मध्ये ओडिशातील राज्यसभा निवडणुकीसाठी त्यांची केंद्रीय निरीक्षक म्हणून नियुक्ती करण्यात आली होती. त्यानंतर आता राजस्थानमधील निवडणुकांची जबाबदारी मिळाल्याने राष्ट्रीय पातळीवर त्यांचा प्रभाव वाढत असल्याचे संकेत मानले जात आहेत.
दुसरीकडे महाराष्ट्रात मनोज जरांगे पाटील यांनी कुणबी प्रमाणपत्रांच्या मुद्द्यावरून बावनकुळेंवर जोरदार हल्लाबोल केला आहे. राज्यात या विषयावर वातावरण तापलेले असतानाच भाजपने त्यांना राष्ट्रीय स्तरावरील जबाबदारी देत स्पष्ट संदेश दिल्याची चर्चा राजकीय वर्तुळात रंगली आहे. पक्ष नेतृत्वाला बावनकुळेंच्या संघटन कौशल्यावर आणि निवडणूक व्यवस्थापन क्षमतेवर पूर्ण विश्वास असल्याचे या नियुक्तीतून दिसून येत आहे.
राजस्थानमधील निवडणुकांमध्ये भाजपसमोर स्थानिक पातळीवरील सत्ता मजबूत ठेवण्याचे मोठे आव्हान आहे. अशा परिस्थितीत महाराष्ट्रातील अनुभवी चेहरा म्हणून बावनकुळे यांना दिलेली जबाबदारी केवळ संघटनात्मक निर्णय नसून आगामी राजकीय रणनीतीचाही महत्त्वाचा भाग मानला जात आहे. त्यामुळे आता राजस्थानच्या रणांगणात बावनकुळे कोणती रणनीती आखतात आणि भाजपला कितपत फायदा करून देतात, याकडे सर्वांचे लक्ष लागले आहे.
