एका चुकीने WhatsApp कायमचं बंद होऊ शकतं! ‘Under Review’चा इशारा; प्रत्येक युजरने जाणून घ्याच हे 5 नियम
पुणे : आजच्या डिजिटल युगात WhatsApp हे केवळ मेसेजिंग ॲप राहिलेले नाही, तर वैयक्तिक संवाद, व्यावसायिक व्यवहार, कागदपत्रांची देवाणघेवाण आणि दैनंदिन संपर्काचे महत्त्वाचे साधन बनले आहे. मात्र, याच WhatsApp च्या सुरक्षा धोरणांबाबत अनेक युजर्स निष्काळजी असल्याचे दिसून येत आहे. Meta कंपनीकडून सुरक्षेच्या नियमांची कठोर अंमलबजावणी केली जात असून, संशयास्पद हालचाली आढळल्यास कोणतीही पूर्वसूचना न देता खाते ‘Under Review’ मध्ये टाकले जाऊ शकते किंवा थेट बॅनही केले जाऊ शकते. अलीकडेच अनेक देशांतील हजारो वापरकर्त्यांना अशा कारवाईचा सामना करावा लागल्याने युजर्समध्ये चिंता वाढली आहे.
सायबर सुरक्षा तज्ज्ञांच्या मते, अनेकदा खाते हॅक होत नाही, तर वापरकर्त्यांच्या काही चुकीच्या सवयींमुळेच ते धोक्यात येते. सर्वात गंभीर चूक म्हणजे GB WhatsApp, WhatsApp Plus यांसारख्या अनधिकृत थर्ड-पार्टी ॲप्सचा वापर. अतिरिक्त फीचर्सच्या नावाखाली ही ॲप्स वापरली जात असली, तरी ती Meta च्या अधिकृत धोरणांच्या विरोधात असल्याने खाते बंद होण्याचा धोका वाढतो.
याशिवाय, कमी वेळात मोठ्या प्रमाणात एकाच प्रकारचे मेसेज किंवा लिंक अनेक अनोळखी नंबरवर पाठवणे, ऑटोमेटेड टूल्सद्वारे बल्क मेसेजिंग करणे किंवा सतत फॉरवर्ड्स करणे हे स्पॅम म्हणून ओळखले जाते. अशा हालचालींवर WhatsApp ची सुरक्षा यंत्रणा सातत्याने लक्ष ठेवत असते.
फेक न्यूज, अप्रमाणित माहिती किंवा समाजात भीती, तेढ अथवा गोंधळ निर्माण करणारे संदेश फॉरवर्ड करणेही धोकादायक ठरू शकते. अशा प्रकारच्या मजकुरामुळे खाते कारवाईच्या कक्षेत येण्यासोबतच संबंधित व्यक्तीवर कायदेशीर कारवाईची शक्यताही नाकारता येत नाही.
हिंसाचाराला प्रोत्साहन देणारे व्हिडिओ, अश्लील मजकूर, बाल लैंगिक शोषणाशी संबंधित सामग्री किंवा धमकीचे संदेश शेअर करणे हे WhatsApp च्या नियमांचे गंभीर उल्लंघन मानले जाते. अशा प्रकरणांमध्ये खाते तात्काळ निलंबित केले जाऊ शकते.
याशिवाय, एखाद्या नंबरविरोधात वारंवार ‘Block’ आणि ‘Report’ केल्यास WhatsApp ची प्रणाली त्या खात्याला संशयास्पद समजून तपासणीसाठी ‘Under Review’ मध्ये ठेवू शकते. त्यामुळे अनोळखी व्यक्तींना विनाकारण मेसेज पाठवणे किंवा त्रासदायक वर्तन करणे टाळणे गरजेचे आहे.
अकाऊंट ‘Under Review’ गेल्यास काय करावे?
अकाऊंट रिव्ह्यूमध्ये गेल्यानंतर सर्वप्रथम अधिकृत WhatsApp ॲपच वापरत असल्याची खात्री करा. स्क्रीनवर दिसणाऱ्या ‘Request a Review’ पर्यायावर क्लिक करून अपील करा. त्यामध्ये आपण नियमांचे उल्लंघन केले नसल्याचे स्पष्टपणे नमूद करा. Meta ची प्रणाली खात्याची पडताळणी करून योग्य असल्यास साधारण 24 तासांच्या आत खाते पुन्हा सुरू करू शकते.
तज्ज्ञांच्या मते, मोबाईलमधील सर्व अनधिकृत WhatsApp ॲप्स हटवून केवळ Google Play Store किंवा Apple App Store वरून अधिकृत ॲप डाउनलोड करावे. तसेच संशयास्पद लिंक, फेक मेसेज, अनोळखी फाइल्स आणि पडताळणी न केलेली माहिती फॉरवर्ड करणे टाळल्यास खाते सुरक्षित राहण्यास मदत होते.
डिजिटल सुरक्षेच्या वाढत्या आव्हानांच्या पार्श्वभूमीवर प्रत्येक WhatsApp युजरने नियमांचे पालन करणे ही काळाची गरज बनली आहे. थोडीशी निष्काळजीपणाही तुमचे महत्त्वाचे WhatsApp खाते कायमचे गमावण्याचे कारण ठरू शकते.
