‘आईच्या डोळ्यात आनंदाश्रू, जंतरमंतरवर जल्लोष!’ अभिजीत दीपके यांच्या लढ्याला यश; धर्मेंद्र प्रधानांच्या राजीनाम्यानंतर पहिली भावूक प्रतिक्रिया
नवी दिल्ली : केंद्रीय शिक्षण मंत्री धर्मेंद्र प्रधान यांनी राजीनामा दिल्याच्या घडामोडीनंतर जंतरमंतरवरील आंदोलनाला नवे वळण मिळाले असून, कॉक्रोज जनता पार्टीच्या आंदोलनकर्त्यांमध्ये उत्साहाचे वातावरण निर्माण झाले आहे. अनेक दिवसांपासून शिक्षण व्यवस्थेतील प्रश्न, स्पर्धा परीक्षांमधील कथित गैरप्रकार आणि विद्यार्थ्यांच्या मागण्यांसाठी आंदोलनाचे नेतृत्व करणारे अभिजीत दीपके यांच्या संघर्षाला हे मोठे यश मानले जात आहे. राजीनाम्याची बातमी समोर येताच जंतरमंतर परिसर घोषणांनी दणाणून गेला आणि आंदोलनकर्त्यांनी जल्लोष साजरा केला.
या घडामोडीनंतर सर्वांचे लक्ष अभिजीत दीपके यांच्या कुटुंबाकडे लागले होते. अखेर त्यांच्या आई अनिता दीपके यांनी माध्यमांशी बोलताना आपल्या भावना व्यक्त केल्या. मुलाच्या संघर्षाचे फळ मिळाल्याचा आनंद व्यक्त करताना त्यांना अश्रू अनावर झाले.
टीव्ही नाईनशी बोलताना अनिता दीपके म्हणाल्या, “गेल्या अडीच महिन्यांत आमच्या घरात कुणालाच शांत झोप लागली नाही. रोज रात्री उशिरापर्यंत अभिजीतची काळजी वाटायची. आंदोलनात काय घडेल, त्याच्यावर कारवाई होईल का, याची सतत भीती होती. तो ६ जूनला बोस्टनहून भारतात आला आणि त्यानंतर पूर्ण वेळ विद्यार्थ्यांच्या प्रश्नांसाठी रस्त्यावर उतरला. अनेक रात्री त्यालाही झोप मिळाली नाही. आज त्याच्या मेहनतीचे चीज झाल्याचे समाधान वाटत आहे.”
अनिता दीपके यांनी यावेळी आंदोलनाच्या सुरुवातीच्या दिवसांचीही आठवण करून दिली. आंदोलनादरम्यान झालेल्या लाठीचार्जनंतर आपण अत्यंत घाबरलो होतो, असे सांगत त्यांनी सरकारने विद्यार्थ्यांच्या भावना समजून घेत लवकर निर्णय घ्यावा, अशी विनंती केली होती. मुलाला अटक झाली असती तर आंदोलन आणखी तीव्र झाले असते, अशी भीतीही त्यांनी त्यावेळी व्यक्त केली होती.
दरम्यान, धर्मेंद्र प्रधान यांच्या राजीनाम्यानंतर आंदोलनकर्त्यांनी हा विद्यार्थ्यांच्या एकजुटीचा आणि लोकशाही मार्गाने दिलेल्या लढ्याचा विजय असल्याचा दावा केला आहे. जंतरमंतरवर मोठ्या संख्येने विद्यार्थी, समर्थक आणि कार्यकर्ते जमा झाले असून, घोषणाबाजी आणि जल्लोषाचे वातावरण पाहायला मिळाले.
आता केंद्र सरकार शिक्षण खात्याची धुरा कोणाकडे सोपवणार, तसेच आंदोलनकर्त्यांच्या उर्वरित मागण्यांवर काय निर्णय घेणार, याकडे देशभरातील विद्यार्थी, पालक आणि शैक्षणिक क्षेत्राचे लक्ष लागले आहे. आंदोलनानंतरच्या या राजकीय घडामोडींमुळे शिक्षण क्षेत्रात पुढील काही दिवस महत्त्वाचे ठरणार असल्याची चर्चा सुरू झाली आहे.
