‘सुनेत्रा पवार मुख्यमंत्री झाल्या तर पहिला आनंद मलाच होईल’; भरणेंच्या विधानाने महाराष्ट्राच्या राजकारणात नवी चर्चा
मुंबई : महाराष्ट्राच्या राजकारणात पुन्हा एकदा मुख्यमंत्रीपदाच्या चर्चांना उधाण आले आहे. केंद्रीय मंत्रिमंडळ विस्ताराच्या पार्श्वभूमीवर मुख्यमंत्री देवेंद्र फडणवीस यांना केंद्रात महत्त्वाची जबाबदारी मिळू शकते, अशा चर्चांनी जोर धरला आहे. या राजकीय घडामोडींमध्ये राष्ट्रवादी काँग्रेसचे ज्येष्ठ नेते आणि राज्याचे कृषिमंत्री दत्तात्रय भरणे यांनी केलेल्या एका विधानाने सत्ताधारी महायुतीत नव्या चर्चांना तोंड फुटले आहे. “सुनेत्रा पवार मुख्यमंत्री झाल्या तर मला सर्वाधिक आनंद होईल,” असे स्पष्ट वक्तव्य भरणे यांनी केले.
राज्यातील बदलत्या राजकीय समीकरणांवर बोलताना भरणे यांनी महाराष्ट्रातून देशाला सर्वोच्च नेतृत्व मिळावे, अशी भावना व्यक्त केली. यशवंतराव चव्हाण आणि शरद पवार यांसारख्या नेत्यांना देशाच्या सर्वोच्च पदापर्यंत पोहोचण्याची संधी मिळाली नाही, अशी खंत व्यक्त करत त्यांनी भविष्यात महाराष्ट्रातील नेतृत्वाने राष्ट्रीय पातळीवर मोठी भूमिका बजावावी, अशी अपेक्षाही मांडली.
यावेळी मुख्यमंत्रीपदाबाबत विचारलेल्या प्रश्नावर भरणे यांनी थेट नाव घेणे टाळले असले, तरी “माझ्या पक्षाच्या अध्यक्षा त्या खुर्चीवर बसल्या तर मला शंभर टक्के पहिला आनंद होईल,” असे म्हणत त्यांनी सुनेत्रा पवार यांच्या नावाला पाठिंबा दर्शवला. त्यांच्या या विधानामुळे राष्ट्रवादी काँग्रेसमध्ये तसेच महायुतीच्या राजकारणात विविध तर्क-वितर्कांना सुरुवात झाली आहे.
दरम्यान, मुख्यमंत्री देवेंद्र फडणवीस यांना केंद्रात स्थान मिळाल्यास राज्याच्या नेतृत्वाची धुरा कोणाकडे जाणार, यावरही चर्चा रंगली आहे. शिवसेनेच्या काही नेत्यांनी उपमुख्यमंत्री एकनाथ शिंदे यांचे नाव पुढे केले असून, प्रशासनाचा अनुभव आणि यापूर्वी मुख्यमंत्री म्हणून केलेले काम यामुळे शिंदे हे नैसर्गिक पर्याय ठरू शकतात, असा दावा केला जात आहे. त्यामुळे भविष्यातील नेतृत्वाबाबत राजकीय वर्तुळात उत्सुकता वाढली आहे.
राजकारणाबरोबरच राज्यातील पावसाच्या परिस्थितीवरही भरणे यांनी भाष्य केले. त्यांनी सांगितले की, यंदा एल निनोच्या परिणामामुळे पावसाचे असमान वितरण झाले आहे. मुंबई आणि कोकणातील काही भागात मुसळधार पाऊस झाला असला तरी मराठवाडा आणि विदर्भात अपेक्षित पाऊस झालेला नाही. आतापर्यंत राज्यात सुमारे ७० टक्के पेरण्या पूर्ण झाल्या असल्या तरी पुरेशा पावसाअभावी अनेक शेतकरी चिंतेत आहेत.
मात्र, हवामान विभागाच्या अंदाजानुसार जुलै महिन्याच्या अखेरीस राज्यात चांगल्या पावसाची शक्यता असून त्यामुळे खरीप हंगामाला दिलासा मिळू शकतो, अशी माहितीही त्यांनी दिली.
केंद्रीय मंत्रिमंडळ विस्तार, मुख्यमंत्रीपदाबाबत सुरू झालेल्या चर्चा, सुनेत्रा पवार यांच्याबाबत भरणे यांनी व्यक्त केलेली भूमिका आणि एकनाथ शिंदे यांच्या नावाची सुरू असलेली चर्चा यामुळे महाराष्ट्रातील राजकीय वातावरण पुन्हा एकदा तापण्याची चिन्हे दिसत आहेत. आगामी काही दिवसांत दिल्लीतील निर्णयांनंतर राज्याच्या सत्तेच्या समीकरणांना कोणते नवे वळण मिळते, याकडे संपूर्ण राज्याचे लक्ष लागले आहे.
