महिला डॉक्टरवरील हल्ला प्रकरण तापले; रमेश म्हात्रेंना ४ दिवसांची पोलीस कोठडी, पक्षाच्या कारवाईकडे लक्ष
डोंबिवली : डोंबिवलीतील शास्त्रीनगर रुग्णालयात महिला डॉक्टरला झालेल्या मारहाण प्रकरणात शिवसेना नगरसेवक रमेश म्हात्रे यांच्या अडचणी आणखी वाढल्या आहेत. या प्रकरणात कल्याण न्यायालयाने रमेश म्हात्रे यांच्यासह इतर तीन आरोपींना १३ जुलैपर्यंत पोलीस कोठडी सुनावली आहे. या निर्णयामुळे आता तपासाला वेग येणार असून, हल्ल्याच्या घटनेमागील नेमकी कारणे आणि सहभागी व्यक्तींची भूमिका पोलिसांकडून तपासली जात आहे.
मिळालेल्या माहितीनुसार, रुग्णालयातील एका प्रकरणावरून झालेल्या वादानंतर महिला डॉक्टर आणि कर्मचाऱ्यांसोबत मारहाणीचा प्रकार घडल्याचा आरोप आहे. या घटनेनंतर रुग्णालयातील डॉक्टर आणि कर्मचाऱ्यांमध्ये संतापाचे वातावरण निर्माण झाले होते. घटनेचा व्हिडीओ समोर आल्यानंतर हे प्रकरण अधिक चर्चेत आले.
या प्रकरणाची सुनावणी कल्याण न्यायालयातील कोर्ट हॉल क्रमांक ६ मध्ये पार पडली. न्याय दंडाधिकारी प्रथम वर्ग सरन्यायाधीश के. एस. कातकडे यांच्या दालनात दोन्ही बाजूंचे म्हणणे ऐकण्यात आले. आरोपींच्या वतीने वकील आनंद पथकी यांनी बाजू मांडली, तर सरकारी पक्षाकडून वकील आनंद आढसकर यांनी युक्तिवाद केला. तपासासाठी आरोपींची पोलीस कोठडी आवश्यक असल्याचा युक्तिवाद सरकारी पक्षाने केला होता. त्यानंतर न्यायालयाने चारही आरोपींना १३ जुलैपर्यंत पोलीस कोठडी सुनावली.
दरम्यान, रमेश म्हात्रे यांना न्यायालयात हजर करण्यासाठी आणले असता कोर्ट परिसरात काही काळ तणाव निर्माण झाला. एका आरोपीविरोधात दाखल असलेल्या विनयभंगाच्या गुन्ह्याची माहिती न्यायालयासमोर ठेवण्यासाठी फिर्यादीच्या नातेवाईकांनी कागदपत्रांची प्रत आत नेण्याची मागणी केली. मात्र त्यावरून पोलिसांसोबत त्यांची शाब्दिक बाचाबाची झाली.
या प्रकरणामुळे राजकीय वर्तुळातही चर्चा सुरू झाली आहे. शिवसेनेने रमेश म्हात्रे यांना कारणे दाखवा नोटीस बजावली असून, पक्षाची प्रतिमा खराब झाल्याच्या मुद्द्यावर त्यांच्याकडून स्पष्टीकरण मागण्यात आले आहे. त्यामुळे आता पक्ष नेतृत्वाकडून पुढील कोणती कारवाई केली जाते, याकडे लक्ष लागले आहे.
दरम्यान, पोलिसांकडून उपलब्ध पुरावे, सीसीटीव्ही फुटेज आणि संबंधित व्यक्तींचे जबाब यांच्या आधारे पुढील तपास सुरू आहे. या प्रकरणात दोषींवर कठोर कारवाईची मागणी विविध स्तरांतून होत आहे.
