भरधाव कारचा मृत्यूचा तांडव! नवी मुंबईत 10 जणांना उडवलं; दोघांचा जागीच अंत, चालक फरार
मुंबई : नवी मुंबईतील तळोजा परिसरातील सेक्टर-10 येथे सोमवारी दुपारी भरधाव कारने भीषण अपघात घडवून आणला. भरधाव वेगाने येणाऱ्या कारवरील चालकाचे नियंत्रण सुटल्याने रस्त्यावरून जाणाऱ्या आणि बाजूला उभ्या असलेल्या तब्बल 10 जणांना जोरदार धडक बसली. या भीषण अपघातात दोघांचा जागीच मृत्यू झाला, तर आठ जण गंभीर जखमी झाले. जखमींना तातडीने जवळच्या रुग्णालयात दाखल करण्यात आले असून काहींची प्रकृती चिंताजनक असल्याची माहिती आहे.
अपघातानंतर चालकाने घटनास्थळावरून पलायन केल्याने परिसरात एकच खळबळ उडाली. स्थानिक नागरिकांनी तत्काळ जखमींना मदत करत पोलिस आणि रुग्णवाहिकांना माहिती दिली. घटनास्थळी दाखल झालेल्या पोलिसांनी पंचनामा करून तपास सुरू केला आहे.
या अपघातात रस्त्याच्या कडेला उभ्या असलेल्या दुचाकी, रिक्षा आणि एका चारचाकी वाहनाचेही मोठे नुकसान झाले. धडकेचा वेग इतका प्रचंड होता की परिसरात काही काळ वाहतूक विस्कळीत झाली. अपघातामुळे घटनास्थळी नागरिकांची मोठी गर्दी जमली होती.
प्राथमिक तपासात भरधाव वेग आणि वाहनावरील नियंत्रण सुटणे हे अपघाताचे कारण असल्याचा अंदाज व्यक्त करण्यात येत आहे. फरार चालकाविरोधात गुन्हा दाखल करण्यात आला असून त्याचा शोध घेण्यासाठी विशेष पथके तैनात करण्यात आली आहेत. परिसरातील सीसीटीव्ही फुटेज आणि इतर तांत्रिक पुराव्यांच्या आधारे तपास सुरू आहे.
या घटनेनंतर नवी मुंबईतील बेदरकार वाहनचालकांचा प्रश्न पुन्हा ऐरणीवर आला आहे. पावसाळ्यात वेगमर्यादेचे उल्लंघन आणि निष्काळजी वाहनचालकांवर कठोर कारवाई करण्याची मागणी नागरिकांकडून होत असून, मृतांची ओळख पटविणे आणि अपघाताचा नेमका घटनाक्रम उलगडण्याचे काम पोलिसांकडून सुरू आहे.
