नसरापूर प्रकरणात आरोपीला फाशी; ‘हा निकाल नराधमांसाठी धडा ठरेल’, उपमुख्यमंत्री एकनाथ शिंदेंची पहिली प्रतिक्रिया
मुंबई : राज्याला हादरवून सोडणाऱ्या नसरापूर येथील अल्पवयीन चिमुरडीवरील अत्याचार आणि हत्या प्रकरणात न्यायालयाने आरोपी भीमराव कांबळे याला फाशीची शिक्षा सुनावल्यानंतर राज्यभरातून समाधान व्यक्त केले जात आहे. या ऐतिहासिक निकालानंतर उपमुख्यमंत्री एकनाथ शिंदे यांनी पहिली प्रतिक्रिया देत न्यायालय, तपास यंत्रणा आणि पोलीस दलाचे कौतुक केले. अशा कठोर शिक्षेमुळे समाजातील विकृत प्रवृत्तींवर प्रभावी आळा बसेल, असा विश्वास त्यांनी व्यक्त केला.
माध्यमांशी संवाद साधताना शिंदे म्हणाले की, या अमानुष गुन्ह्याचा तपास अत्यंत वेगाने आणि काटेकोरपणे करण्यात आला. तपास अधिकाऱ्यांनी पुरावे गोळा करण्यापासून आरोपपत्र दाखल करण्यापर्यंत प्रत्येक टप्प्यावर दक्षता घेतली. त्यामुळे न्यायालयासमोर भक्कम पुरावे सादर करण्यात यश आले आणि आरोपीला कठोर शिक्षा सुनावली गेली.
या प्रकरणात पोलिसांनी अल्पावधीत आरोपपत्र दाखल करून खटला जलदगती न्यायालयात चालविण्यासाठी आवश्यक प्रक्रिया पूर्ण केली. अत्याचार, हत्या आणि पॉक्सो कायद्यांतर्गत दाखल गुन्ह्यांमध्ये न्यायालयाने आरोपीला दोषी ठरवत फाशीची शिक्षा सुनावली. या निकालामुळे राज्यातील न्यायव्यवस्था आणि तपास यंत्रणांवरील विश्वास अधिक दृढ झाल्याचे मत व्यक्त केले जात आहे.
उपमुख्यमंत्री शिंदे यांनी विशेषतः तपासात सहभागी झालेल्या पोलीस अधिकारी आणि कर्मचाऱ्यांचे अभिनंदन केले. “या प्रकरणात पोलिसांनी अक्षरशः रात्रंदिवस मेहनत घेतली. शासनानेही सातत्याने या तपासावर लक्ष ठेवले. त्यामुळे अल्पावधीत न्याय मिळू शकला,” असे त्यांनी सांगितले.
दरम्यान, भाजप नेत्या चित्रा वाघ यांनीही या निर्णयाचे स्वागत करत हा निकाल समाजातील विकृत मानसिकतेला कठोर संदेश देणारा असल्याचे म्हटले. मुख्यमंत्री देवेंद्र फडणवीस यांच्या नेतृत्वाखाली गंभीर गुन्ह्यांबाबत ‘झिरो टॉलरन्स’ धोरण राबवले जात असल्याचे त्यांनी नमूद केले.
राज्याचे मंत्री गिरीश महाजन यांनीही न्यायालयाच्या निर्णयाचे स्वागत करत हा निकाल भविष्यात अशा प्रकारच्या गुन्ह्यांना आळा घालणारा ठरेल, असा विश्वास व्यक्त केला. आरोपीने उच्च न्यायालयात दाद मागितली तरी शासन कठोर शिक्षेसाठी कायदेशीर लढा सुरू ठेवेल, असेही त्यांनी स्पष्ट केले.
नसरापूर प्रकरणातील या निकालामुळे राज्यात जलद तपास, प्रभावी पुरावे आणि वेगवान न्यायप्रक्रियेबाबत नवा आदर्श निर्माण झाल्याची भावना विविध स्तरांतून व्यक्त होत आहे.
