पुणेकरांनो लक्ष द्या! 2 जूनला ‘या’ भागांचा पाणीपुरवठा पूर्णपणे बंद राहणार; जाणून घ्या प्रभावित परिसर
पुणे : पुणे महानगरपालिकेच्या लष्कर जलकेंद्रावर अत्यावश्यक देखभाल आणि दुरुस्तीची कामे हाती घेण्यात येणार असल्याने शहरातील काही भागांचा पाणीपुरवठा 2 जून रोजी पूर्णपणे बंद राहणार आहे. तसेच 3 जून रोजीही संबंधित परिसरांमध्ये कमी दाबाने किंवा उशिरा पाणीपुरवठा होण्याची शक्यता वर्तविण्यात आली आहे.
महापालिकेच्या पाणीपुरवठा विभागाने दिलेल्या माहितीनुसार, जलवितरण यंत्रणा आणि अन्य महत्त्वाच्या सुविधांच्या देखभाल-दुरुस्तीची कामे करण्यात येणार आहेत. त्यामुळे ठाकरसी जलटाकीमार्फत पाणीपुरवठा होणाऱ्या परिसरांमध्ये एक दिवस पाणीपुरवठा बंद ठेवण्यात येणार आहे.
‘या’ भागांमध्ये पाणीपुरवठा बंद
संपूर्ण येरवडा, संगमवाडी, गांधीनगर, कल्याणीनगर, बंगला क्रमांक 5 परिसरातील काही भाग, लूप रोडलगतची शासकीय वसाहत, जय जवान नगर, यूपी हॉटेल परिसर, रामनगर, लक्ष्मीनगर आणि कोरेगाव पार्क या भागांमध्ये 2 जून रोजी दिवसभर पाणीपुरवठा खंडित राहणार आहे.
महापालिकेने स्पष्ट केले आहे की, दुरुस्तीची कामे पूर्ण झाल्यानंतरही पाणी वितरण व्यवस्था पूर्ववत होण्यासाठी काही वेळ लागू शकतो. त्यामुळे 3 जून रोजी संबंधित भागांमध्ये पाणी उशिरा येणे किंवा कमी दाबाने मिळणे अशी परिस्थिती निर्माण होऊ शकते.
उन्हाळ्यामुळे आधीच पाण्याची मागणी वाढलेली असताना या कामांचा परिणाम हजारो नागरिकांवर होणार आहे. त्यामुळे नागरिकांनी आवश्यकतेनुसार पाण्याचा साठा करून ठेवावा आणि उपलब्ध पाण्याचा काटकसरीने वापर करावा, असे आवाहन महापालिकेने केले आहे.
दरम्यान, पाणीपुरवठा विभागाने कामे शक्य तितक्या लवकर पूर्ण करण्याचे आश्वासन दिले असून नागरिकांनी प्रशासनाला सहकार्य करण्याचे आवाहन करण्यात आले आहे.
