भाविकांनो लक्ष द्या! भीमाशंकर मंदिर ‘इतके’ महिने राहणार बंद, काय आहे कारण?
पुणे : पुणे जिल्ह्यातील प्रसिद्ध तीर्थक्षेत्र भीमाशंकर मंदिर संदर्भात भाविकांसाठी महत्त्वाची बातमी समोर आली आहे. दर्शनासाठी जाण्याचा विचार करत असाल, तर हा निर्णय जाणून घेणे आवश्यक आहे.
बारा ज्योतिर्लिंगांपैकी सहावे ज्योतिर्लिंग म्हणून ओळखले जाणारे हे पवित्र मंदिर काही दिवसांसाठी भाविकांसाठी बंद ठेवण्यात येणार आहे. प्रशासनाने घेतलेल्या निर्णयानुसार ९ एप्रिल ते ३१ मे २०२६ या कालावधीत मंदिरात प्रत्यक्ष दर्शन बंद राहणार आहे.
मंदिर परिसरात सुरू असलेली विकासकामे, सुरक्षिततेची कारणे आणि भाविकांची वाढती गर्दी लक्षात घेऊन हा निर्णय घेण्यात आला आहे. या कालावधीत मंदिरात कोणालाही प्रवेश दिला जाणार नाही, अशी स्पष्ट सूचना प्रशासनाकडून देण्यात आली आहे.
मंदिर परिसरात सुरू असलेल्या विविध विकासकामांमुळे आणि भाविकांच्या सुरक्षिततेचा विचार करून हा महत्त्वाचा निर्णय घेण्यात आला आहे. पुण्याचे जिल्हाधिकारी जितेंद्र दुडी यांनी याबाबत अधिकृत माहिती दिली आहे. यामुळे पुढील सुमारे ५३ दिवस भाविकांना प्रत्यक्ष मंदिरात जाऊन दर्शन घेता येणार नाही.
भीमाशंकर मंदिर परिसरात सध्या विविध विकासकामांना वेग आला आहे. नवीन सभामंडप उभारण्याचे काम युद्धपातळीवर सुरू असून, त्यासोबतच मंदिर परिसरातील पायऱ्यांचा मार्ग, मूलभूत सुविधा आणि इतर सुधारणा प्रकल्पही राबवले जात आहेत.
या कामांदरम्यान परिसरात मोठ्या प्रमाणावर यंत्रसामग्री आणि बांधकाम साहित्य ठेवण्यात आले असल्याने भाविकांच्या हालचालींवर निर्बंध येत आहेत. त्यामुळे सुरक्षिततेच्या दृष्टीने प्रशासनाने विशेष काळजी घेतली आहे.
भाविकांची वाढती गर्दी लक्षात घेता, सध्याच्या परिस्थितीत कोणताही अपघात घडू नये आणि सुरक्षेचा धोका निर्माण होऊ नये यासाठी प्रशासनाने मंदिर तात्पुरते बंद ठेवण्याचा निर्णय घेतला आहे.
