पुणे महापालिकेसाठी दोन्ही राष्ट्रवादी एकत्र येणार का? शरद पवारांचा मोठा निर्णय काय? प्रशांत जगतापांनी दिली अपडेट
पुणे : स्थानिक स्वराज्य संस्थांच्या निवडणुकांच्या पार्श्वभूमीवर राज्यात विविध राजकीय समीकरणे तयार होताना दिसत आहेत. अशातच गेल्या काही दिवसांपासून या निवडणुकीसाठी राष्ट्रवादी शरद पवार गट आणि राष्ट्रवादी अजित पवार गट एकत्र निवडणूक लढवणार असल्याच्या चर्चांनी जोर धरला होता. मात्र पुण्याच्या महापालिका निवडणुकीत दोन राष्ट्रवादी एकत्र येणार नाहीत, महाविकास आघाडीतुनचं निवडणूक लढायची असे पक्षाचे अध्यक्ष शरद पवारांनी सगळ्यांना सांगितली आहे.अशी माहिती राष्ट्रवादी काँग्रेस शरद पवार गटाचे शहराध्यक्ष प्रशांत जगताप यांनी दिली आहे. त्यामुळे दोन्ही राष्ट्रवादी एकत्र येण्याच्या चर्चेला आता पूर्णविराम मिळाला आहे.
स्थानिक स्वराज्य संस्था निवडणुकीत दोन्ही राष्ट्रवादींनी एकत्र यावी अशी भूमिका समोर येताच शरद पवार यांच्या राष्ट्रवादीचे नेते प्रशांत जगताप यांनी त्याला कडाडून विरोध केला. नाराज असलेले जगताप यांनी पक्षाचे अध्यक्ष शरद पवार यांची भेट घेतली.त्यानंतर दोन्ही राष्ट्रवादी एकत्र येण्याबाबत काय निर्णय होतो याकडे सर्वांचे लक्ष लागले होते. तर या बैठकीनंतर प्रशांत जगताप यांनी याविषयीची माहिती दिली.दोन्ही राष्ट्रवादी स्थानिक स्वराज्य संस्थांच्या निवडणुकीत एकत्र लढणार नाहीत, असा निर्णय शरद पवार यांनी घेतल्याची माहिती जगताप यांनी दिली. तसेच प्रदेशाध्यक्ष शशिकांत शिंदे यांनाही हा निर्णय पवारांनी फोनवरून सांगितल्याचे जगताप यांनी स्पष्ट केले.
पुढे बोलताना ते म्हणाले, गेल्या साडेचार वर्षांपासून एकत्र राष्ट्रवादी, नंतर शरदचंद्र पवार राष्ट्रवादी पक्ष अशा प्रकारे आपल्याला दोन्ही पक्षात काम करण्याची संधी मिळाली. माजी महापौर या नात्यानं मला शहरातील प्रश्न माहिती होते. कार्यकर्त्यांचं संघटनं मी केलं. शरद पवार हे आमचे श्रद्धास्थान आहे. आम्ही महाविकास आघाडी म्हणून लढलो. तर काहींनी अजितदादांच्या राष्ट्रवादीसोबत जाण्याचा सूर आवळला. महाविकास आघाडी तोडण्याचे काहींनी सूतोवाच केला. यामुळे महाविकास आघाडीत मीठाचा खडा पडण्याचा प्रयत्न होत असल्याचे प्रशांत जगताप यांनी सांगितले.
