पुणे रेव्ह पार्टी प्रकरण ; सुप्रिया सुळेंनी खडसेंची बाजू सावरली, म्हणाल्या……
पुणे : राष्ट्रवादी शरद पवार पक्षाच्या महिला प्रदेशाध्यक्षा रोहिणी खडसे यांचे पती प्रांजल येवलकर यांना रेव्ह पार्टी प्रकरणी अटक करण्यात आली आहे. यामुळे राजकीय वर्तुळातही खळबळ उडाली आहे. या प्रकरणानंतर आता रोहिणी खडसेंच्या राजीनाम्याची मागणी जोर धरत आहे. पण राष्ट्रवादी काँग्रेस शरद पवार पक्षाच्या नेत्या सुप्रिया सुळेंनी मात्र आपण आणि पक्ष रोहिणी खडसेंच्या मागे ठाम उभे राहणार असल्याचे भाष्य केले आहे.
गेल्या अनेक दिवसांपासून एकनाथ खडसे महायुतीच्या नेत्यांवर शा‍ब्दिक वार करत आहेत. पण त्यांच्या जावयाला आता रेव्ह पार्टीप्रकरणी अटक झाल्याने राजकीय वातावरण तापले आहे. यातच राष्ट्रवादी गटाच्या सुप्रिया सुळेंनी रोहिणींचा या प्रकरणाशी काय संबंध? त्यांचा नवरा प्रकरणात आहे, मग त्यांचा राजीनामा घ्यायचा का? असा सवाल उपस्थित केला आहे.एक महिला म्हणून त्यांनी खडसेंची बाजू सावरली आहे.
याबाबत पुढे बोलताना त्या म्हणाल्या, एखादी महिला सक्षमपणे उभी राहत असेल तर या पुरुषांना काय त्रास होतोय. काल माधुरी मिसाळ यांच्या बाबत शिरसाट यांनी लिहिलेल पत्र पाहिलं. ती महिला सक्षम आहे. तिला अधिकार आहे बैठका घेण्याचा. मग तुमच्या पोटात का दुखतंय?’ अशा शब्दांत त्यांना सुनावले आहे.
