Pimpri Crime : बाप-लेकाचा वाद नडला, रागात दिव्यांग मुलाचे खळबळजनक कृत्य, घटनेनं सगळेच हादरले..
Pimpri Crime : दिवसागणिक पुण्यातली गुन्हेगारी वाढते आहे असं म्हटलं तरी हरकत नाही. कोयता घेऊन रस्त्याने फिरणे, टोळा धाडी, गाड्या जाळणे एवढंच नाही तर शुल्लक रकमेसाठी हात तोडण्यासारख्या अंगावर काटा आणणारे प्रकार सध्या पुण्यात वेगात वाढले आहेत.सध्या असाच एक प्रकार समोर आला आहे.
वडिलांसोबत भांडण झाल्याने दिव्यांग मुलाने डोक्यात अवजड वस्तूने मारून त्यांचा खून केल्याची धक्कादायक घटना उघडकीस आली आहे. गुरुवारी (ता.३०) सकाळी खेड तालुक्यातील दौंडकरवाडी येथे घडली आहे.
खंडू लांडे (रा. दौंडकरवाडी, ता. खेड) असे खून झालेल्या व्यक्तीचे नाव आहे. याप्रकरणी खंडू यांचा मोठा मुलगा बाबाजी खंडू लांडे (वय. ३५) यांनी चाकण पोलीस ठाण्यात फिर्याद दिली आहे. त्यानुसार खंडू यांचा लहान मुलगा नितीन खंडू लांडे (वय. ३२) याच्या विरोधात गुन्हा दाखल करण्यात आला आहे.
मिळालेल्या माहिती नुसार, नितीन लांडे याने वडील खंडू यांच्याशी घरातील किरकोळ कारणावरून वाद घातला. त्यातून वडिलांच्या डोक्यात अवजड वस्तूने मारून त्यांना गंभीर जखमी केले. हा प्रकार फिर्यादी यांच्या चुलत भावाने पाहिला आणि त्याबाबत फिर्यादींना फोनवरून माहिती दिली.
फिर्यादी कामानिमित्त बाहेर असताना हा प्रकार घडला. खंडू यांना चाकण येथील एका खासगी रुग्णालयात दाखल करण्यात आले. तिथून दुसऱ्या हॉस्पिटलमध्ये उपचारासाठी हलविण्याचा डॉक्टरांनी सल्ला दिला. त्यानुसार त्यांना खासगी रुग्णालयात दाखल करण्यात आले.
मात्र, उपचारांदरम्यान गुरुवारी रात्री पावणेआठच्या सुमारास खंडू यांचा मृत्यू झाला. आरोपी मनोरुग्ण असल्याचे पोलिसांनी सांगितले. त्यानुसार पुढील कारवाई केली. या घटनेचा पुढील तपास पोलीस करीत आहेत.
