पुष्पा-2 प्रिमियरमध्ये मृत्युमुखी पडलेल्या महिलेच्या कुटंबीयांना ५० लाखांची मदत, निर्मात्यांचा निर्णय…
मुंबई : अभिनेता अल्लू अर्जुन आणि रश्मिका मंदाना यांचा पुष्पा २ चित्रपट डिसेंबरच्या सुरुवातीला सर्वत्र प्रदर्शीत झाला आहे. चित्रपट प्रदर्शीत झाल्यापासून तो सतत कोणत्या ना कोणत्या गोष्टीसाठी चर्चेत आहे.
या चित्रपटाच्या प्रीमियर दरम्यान हैदराबादमधील एका चित्रपटगृहात चेंगराचेंगरी झाली होती. या चित्रपटगृहासमोर झालेल्या चेंगराचेंगरीत या महिलेचा मृत्यू झाला होता. त्यानंतर या चित्रपटात प्रमुख भूमिकेत असलेला अल्लू अर्जुन चांगलाच चर्चेत आला आहे.
त्याच्याविरोधात थेट गुन्हा दाखल करण्यात आला असून त्याच्यावर अटकेचीही कारवाई करण्यात आली होती. या प्रकरणाला हवा मिळाल्यानंतर अल्लू अर्जुनने या महिलेच्या कुटुंबीयांना आर्थिक मदत करण्याची घोषणा केली होती. त्यानंतर आता या चित्रपटाच्या निर्मात्यांनी महिलेच्या कुटुंबीयांना ५० लाख रुपयांची मदत केली आहे.
मिळालेल्या माहितीनुसार, या चित्रपटाच्या निर्मात्यांनी सोमवारी (ता.२३) मृत महिलेच्या कुटुंबीयांना ५० लाख रुपये दिले आहेत. याच मृत महिलेच्या मुलाचा यरनेनी रुग्णालयात उपचार चालू आहे.
दरम्यान, याच रुग्णालयात जात पुष्पा-2 चित्रपटाचे निर्माते नवीन यरनेनी यांनी मृत महिलेच्या कुटुंबाला ही आर्थिक मदत दिली आहे. महिलेच्या मृत्यूमुळे नवीन यरनेनी यांनी दु:ख व्यक्त केलं आहे. तसेच त्यांनी आम्हाला मृत महिलेच्या कुटुंबाला मदत करायची होती, त्यामुळे ही मदत दिली आहे, असे सांगितले आहे.
