बुलढाणा हादरला! नवऱ्यासमोर १९ वर्षीय विवाहितेवर अत्याचार; शस्त्राचा धाक, लूट आणि आरोपींचं थरारक पलायन
बुलढाणा : बुलढाणा जिल्ह्यातील मलकापूर तालुक्यात घडलेल्या एका अमानुष घटनेने संपूर्ण जिल्हा हादरला आहे. दुधलगाव परिसरात शेतात मजुरी करणाऱ्या मध्य प्रदेशातील एका दाम्पत्यावर मध्यरात्री दोन अज्ञात आरोपींनी हल्ला करत १९ वर्षीय विवाहितेवर तिच्या पतीसमोरच अत्याचार केल्याचा धक्कादायक प्रकार समोर आला आहे. यानंतर आरोपींनी दाम्पत्याकडील मोबाईल फोन आणि रोख रक्कम हिसकावून दुचाकीवरून पळ काढला. या घटनेमुळे परिसरात भीतीचे वातावरण पसरले असून आरोपी अद्याप पोलिसांच्या हाती लागलेले नाहीत.
पोलिसांनी दिलेल्या माहितीनुसार, पीडित दाम्पत्य मूळचे मध्य प्रदेशातील असून रोजगाराच्या शोधात ते काही दिवसांपासून मलकापूर तालुक्यातील दुधलगाव परिसरात शेतमजुरी करत होते. काम संपल्यानंतर दोघेही शेतातच झोपले होते. मध्यरात्री दोन अनोळखी इसम हातात धारदार शस्त्र घेऊन तेथे पोहोचले. त्यांनी प्रथम पतीला जीवे मारण्याची धमकी देत त्याला रोखून धरले. त्यानंतर पत्नीवर आळीपाळीने अत्याचार केल्याचा आरोप तक्रारीत करण्यात आला आहे.
घटना घडल्यानंतर आरोपींनी पीडितांकडील मोबाईल फोन आणि जवळील रोख रक्कम हिसकावली. त्यानंतर ते दुचाकीवरून अंधाराचा फायदा घेत पसार झाले. काही वेळाने पीडित दाम्पत्याने मदतीसाठी धाव घेतली आणि संपूर्ण प्रकार पोलिसांना कळवला. पीडित महिलेच्या तक्रारीवरून मलकापूर ग्रामीण पोलीस ठाण्यात गंभीर कलमांखाली गुन्हा दाखल करण्यात आला आहे.
या प्रकरणाचा तपास वेगाने सुरू असून आरोपींचा माग काढण्यासाठी पोलिसांनी पाच विशेष पथके तयार केली आहेत. घटनास्थळाची पाहणी करून फॉरेन्सिक पुरावे गोळा करण्यात आले आहेत. तसेच परिसरातील सीसीटीव्ही फुटेज, दुचाकीच्या हालचाली, मोबाईल लोकेशन आणि तांत्रिक माहितीच्या आधारे आरोपींचा शोध सुरू असल्याची माहिती पोलिसांनी दिली. जिल्ह्याच्या सीमांवरही सतर्कता वाढवण्यात आली असून शेजारच्या जिल्ह्यांनाही आरोपींबाबत माहिती देण्यात आली आहे.
दरम्यान, या घटनेमुळे ग्रामीण भागातील महिला आणि स्थलांतरित मजुरांच्या सुरक्षेचा प्रश्न पुन्हा एकदा ऐरणीवर आला आहे. रात्री शेतात मुक्काम करणाऱ्या मजुरांच्या सुरक्षेसाठी अधिक प्रभावी उपाययोजना करण्याची मागणी स्थानिक नागरिकांकडून होत आहे. आरोपींना तातडीने अटक करून कठोर शिक्षा व्हावी, अशी मागणी विविध सामाजिक संघटनांनी केली आहे.
या प्रकरणातील दोन्ही आरोपी अद्याप फरार असून त्यांचा शोध सुरू आहे. लवकरच आरोपींना अटक करण्यात येईल, असा विश्वास तपास यंत्रणांनी व्यक्त केला आहे. या घटनेने बुलढाणा जिल्ह्यात संतापाची लाट उसळली असून नागरिकांमध्ये असुरक्षिततेची भावना वाढली आहे.
