विनोद खुटे यांची कोट्यवधींची मालमत्ता जप्त; ईडीची कारवाई..
पुणे : ईडीने पुन्हा एकदा कारवाई केली आहे. ईडीने विनोद खुटे यांची ३८ कोटी ५० लाखांची मालमत्ता जप्त केली आहे. ईडीने पुणे, मुंबई आणि अहमदाबादमध्ये छापेमारी करत बँकेतील २३ कोटींची रक्कम सुद्धा गोठवली आहे.
या प्रकरणात विनोद तुकाराम खुटे, संतोष खुटे, मंगेश खुटे, किरण पितांबर अनारसे, अजिंक्य बदाधे आणि अजून काही जणांवर पुण्यातील भारती विद्यापीठ पोलिस ठाण्यात गुन्हा दाखल करण्यात आला आहे.
मिळालेल्या माहितीनुसार, विनोद खुटे याने काना कॅपिटलच्या ब्रोकरेजमध्ये विविध गुंतवणूकदारांकडून १२५ कोटी रुपयांचा निधी गोळा केल्याचा आरोप तपास एजन्सीने केला आहे. खुटे फसवणूक करून दुबईत फरार झाला आहे. दुबईत त्याचे अनेक फ्लॅट्स असल्याची माहिती समोर आली आहे.
पुणे शहरात विनोद खुटे याने धनश्री मल्टी स्टेट को-ऑप क्रेडिट सोसायटी तयार केली. त्याने गुंतवणूकदारांना चांगल्या व्याजाचे आमिष दाखवले. इतर ठिकाणी मिळत असलेल्या व्याजापेक्षा जास्त व्याज दिले. यामुळे असंख्य गुंतवणूकदारांनी त्याच्या पतपेढीत मोठी गुंतवणूक केली. ही गुंतवणूक त्याने हवाला चॅनेल आणि शेल कंपन्यांद्वारे देशाबाहेर पाठवली आहे.
