झेडपी आणि पंचायत समिती निवडणुकांकरिता मतदार यादीतील नाव शोधण्यासाठी ‘मताधिकार’ मोबाईल अॅपचा वापर करा ; जिल्हाधिकाऱ्यांचे आवाहन

पुणे : जिल्हा परिषद आणि पंचायत समित्यांच्या सार्वत्रिक निवडणुकांसाठीकरिता मतदार यादीतील मतदाराचे नाव तसेच मतदान केंद्र शोधण्याकरिता ‘मताधिकार’ मोबाईल ॲप उपलब्ध करून देण्यात आले आहे.अधिकाधिक मतदारांनी या ॲपचा वापर करावा, असे आवाहन जिल्हाधिकारी जितेंद्र डुडी यांनी केले आहे.

जिल्हा परिषद आणि पंचायत समित्यांच्या निवडणुकांकरिता ७ फेब्रुवारी २०२६ रोजी मतदान होणार आहे. याकरिता मतदाराचे नाव व मतदान केंद्र शोधण्याकरिता ‘मताधिकार’ मोबाईल ॲप ‘गुगल प्ले स्टोअर’ वरुन डाऊनलोड करता येईल. या ॲपमध्ये मतदाराचे नाव शोधण्यासाठी दोन पर्याय उपलब्ध करुन देण्यात आले आहेत. त्यानुसार मतदाराचे संपूर्ण नाव किंवा मतदार ओळखपत्राचा क्रमांक नमूद करून मतदार यादीतील नाव शोधता येते. ॲपच्या माध्यमातून आपले मतदान केंद्रही शोधता येणार आहे.

याशिवाय मतदार यादीतील नाव शोधण्यासाठी https://mahasecvoterlist.in/ हे संकेतस्थळदेखील उपलब्ध करुन देण्यात आले आहे, त्यातील Search Name in Voter List वर क्लिक करून मोबाईल ॲपप्रमाणेच ‘नाव’ किंवा ‘मतदार ओळखपत्रा’चा क्रमांक नमूद करुन नाव शोधता येईल, अशी माहिती जिल्हाधिकारी डुडी यांनी दिली आहे.