मोठी बातमी! उद्धव ठाकरे राज ठाकरेंच्या भेटीला, शिवतीर्थवर सगळंच ठरणार, बंद दाराआड नेमकं काय घडतंय?
मुंबई : राज्याच्या राजकारणातील सर्वात मोठी आणि महत्त्वपूर्ण घडामोड. उबाठा गटाचे प्रमुख उद्धव बाळासाहेब ठाकरे आणि मनसे प्रमुख राज ठाकरे यांची भेट होत आहे. राज ठाकरे यांच्या निवासस्थानी जाऊन भेट घेतली आहे. आगामी निवडणुकीच्या पार्श्वभूमीवर ही भेट अत्यंत महत्त्वाची मानली जात असून, यामुळे ठाकरे बंधूंच्या संभाव्य युतीचे संकेत मिळत आहेत.
तसेच एकीकडे दोन्ही पक्ष स्वबळावर निवडणुका लढवणार असल्याचा नारा देत असतानाच, उद्धव ठाकरे यांनी थेट राज ठाकरे यांच्या शिवतीर्थावरील निवासस्थानी जाऊन भेट घेतल्याने राजकीय वर्तुळात अनेक तर्कवितर्क सुरू झाले आहेत. ही भेट केवळ सदिच्छा भेट नसून,
निवडणुकीच्या पार्श्वभूमीवर महत्त्वपूर्ण चर्चा करण्यासाठी झाल्याचे मानले जात आहे. मिळालेल्या माहितीनुसार, दोन्ही नेत्यांमध्ये जागावाटपावरून संभाव्य चर्चा झाली असण्याची शक्यता आहे. विशेषतः, आगामी महानगरपालिका निवडणुकांच्या पार्श्वभूमीवर ही भेट खूप महत्त्वपूर्ण आहे.
दरम्यान, महापालिका निवडणुकीत जागावाटपाची नेमकी रणनीती काय ठेवायची, यावर विचारविनिमय करण्यासाठीच ही बैठक झाली असल्याचे बोलले जात आहे. राज्यात सत्तासंघर्ष शिगेला पोहोचलेला असताना ठाकरे बंधूंनी एकत्र येण्याची शक्यता निर्माण होणे, ही विरोधी पक्षांसाठी मोठी धोक्याची घंटा ठरू शकते.
दुसऱ्या आणि तिसऱ्या फळीतील नेत्यांशिवाय ही भेट होत आहे. दोन्ही भावांमध्ये जागावाटपावरुन संभाव्य चर्चा होणार असल्याची माहिती मिळाली आहे. ठाकरे बंधूंची युती होणार असे संकेत दिसत असले तरीसुद्धा याबाबत अधिकृत घोषणा केलेली नाही. असं झालं तर महाराष्ट्राच्या राजकारणावर आणि आगामी निवडणुकांवर याचा मोठा परिणाम होणार असल्याचे बोलले जात आहे.
