पुण्यातील लाखो वाहनांची वर्दळ असलेल्या सिंहगड रोडवर वाहतूक कोंडी ; प्रवासी वैतागले…
पुणे : गेल्या काही दिवसापासून सुरू असलेल्या मुसळधार पावसाचा परिणाम आता शहरातील वाहतुकीवरही मोठ्या प्रमाणावर झाला आहे. पुण्यातील लाखो वाहनांची वर्ग असलेल्या सिंहगड रस्त्यावर प्रचंड वाहतूक कोंडी झाली असून विठ्ठलवाडी परिसरात वाहनांच्या लांबच लांब रांगा लागल्या आहेत. यामुळे प्रवासी त्रस्त झाले आहेत.
पुण्यात सकाळपासून जोरदार मुसळधार पाऊस सुरू असल्याने सिंहगड रोड,कोथरूड, स्वारगेट, कात्रज आणि नगर रोड परिसरात पाणी साचले आहे. त्यामुळे परिसरात वाहनांच्या मोठ्या रांगा लागल्या आहेत.सिंहगड रस्ता हा पुण्यातील महत्त्वाचा आणि दैनंदिन लाखो वाहनांची वर्दळ असलेला मार्ग आहे. मात्र वारंवार होणारी वाहतूक कोंडी, खड्डेमय रस्ते, तसेच पर्यायी रस्त्यांचा अभाव यामुळे पुणेकर त्रस्त झाले आहेत.
दरम्यान शहरात सुरू असलेल्या मुसळधार पावसाने रस्त्यांवर खड्डे पडले आहेत. यामुळे वाहनांची गती मंदावते, आणि त्याचा परिणाम वाहतुकीच्या कोंडीत दिसून येतो.त्यातच सिंहगड रोडवरील नव्याने उभारण्यात आलेल्या उड्डाणपूलाचे अद्याप लोकार्पण झालेले नाही. त्यामुळे वाहतुकीचा ताण अजूनही इतर रस्त्यांवरच वाढतो आहे.
