Theur : मित्रांसोबत आकाड पार्टी करण्यासाठी गेल्यानंतर झाला वाद, तरुणावर हल्ला, थेऊर येथील धक्कादायक घटना..
Theur : दिवसागणिक गुन्हेगारी वाढते आहे असं म्हटलं तरी हरकत नाही. कोयता घेऊन रस्त्याने फिरणे, टोळा धाडी, गाड्या जाळणे एवढंच नाही तर शुल्लक रकमेसाठी हात तोडण्यासारख्या अंगावर काटा आणणारे प्रकार सध्या वेगात वाढले आहेत.
सध्या अशीच एक धक्कादायक घटना समोर आली आहे. गटारी अमावस्येला मित्रांसोबत हॉटेलमध्ये जेवणासाठी गेल्यानंतर किरकोळ कारणावरून तरुणावर धारधार शस्त्राने वार केल्याची घटना घडली आहे.
हि घटना थेऊर (ता. हवेली) ग्रामपंचायत हद्दीतील दिल्लीवाला गोठा परिसरात रविवारी (ता.४) रात्री साडे अकरा वाजण्याच्या सुमारास घडली आहे. तसेच याप्रकरणी लोणी काळभोर पोलीस ठाण्यात तीन जणांवर गुन्हा दाखल करण्यात आला आहे.
सोहेल इसाक शेख (वय.२० वर्षे, धंदा क्लिनर, रा. आलिफनगर, थेऊर, ता. हवेली) असे जखमी झालेल्या तरुणाचे नाव आहे. तर दिपक जाधव (वय.२४), सनी पवार (वय. २४), विजय जाधव (वय.१८, सर्व रा. थेऊर, ता. हवेली) अशी गुन्हा दाखल झालेल्या आरोपींची नावे आहेत.
सविस्तर माहिती अशी की, फिर्यादी सोहेल शेख व त्यांचे मित्र सुरज शेख, प्रविण चोपटे, विजय जाधव, सनी पवार, दिपक जाधव व विनायक गाढवे हे गटारी अमावस्या निमित्त जेवण करण्यासाठी थेऊर नायगाव रस्त्यावरील दिल्लीवाला गोठा परिसरात असलेल्या एका हॉटेलमध्ये जेवण करण्यासाठी गेले होते. Theur
जेवण झाल्यानंतर आरोपी दिपक जाधव, सनी पवार, विजय जाधव काहीही कारण नसताना फिर्यादी सोहेल शेख यांना हाताने मारहाण करुन शिवीगाळ केली. तसेच आरोपीपैकी सनी पवार याने धारदार हत्याराने फिर्यादी सोहेल शेख यांच्या डोक्यात मारुन वार केला. या हाणामारीत सोहेल शेख हे जखमी झाले असून त्यांच्यावर एका खाजगी रुग्णालयात उपचार सुरु आहेत.
दरम्यान, याप्रकरणी सोहेल शेख यांनी वरील तिन्ही आरोपींच्या विरोधात तक्रार दिली. त्यानुसार आरोपींच्या विरोधात गुन्हा दाखल करण्यात आला आहे. पुढील तपास लोणी काळभोर पोलीस ठाण्याचे सहाय्यक पोलीस निरीक्षक शिवशांत खोसे करीत आहेत.
