भर उन्हात थांबली माणुसकीची गाडी!! अधिकाऱ्यांचे होतंय कौतुक, नेमकं घडलं काय?
छत्रपती संभाजीनगरहून परत परभणीला येत असताना, पोलीस अधीक्षक रविंद्रसिंग परदेशी यांची नजर अंबड जवळील घनसावंगी फाट्याजवळ एका वृद्ध महिलेवर गेली. या आजी वाहतूक रस्त्याच्या कडेला थकल्या अवस्थेत उभ्या होत्या. यावेळी भर दुपारी, तापलेल्या रस्त्यावर एका थकलेल्या वृद्ध आजीला पाणी पाजून, त्यांच्या चपला, काठी उचलून सावलीत नेऊन बसवणाऱ्या पोलीस अधीक्षकांचे कौतुक होत आहे.
आजीला बघताच अधिकाऱ्यांच्या गाडीचा वेग क्षणात थांबला. अधिकाराचं बडेजाव बाजूला ठेऊन परदेशी खाली उतरले. आजींना पाणी दिलं. त्यांच्या अवस्थेची चौकशी करत, हात देऊन झाडाच्या सावलीत नेऊन बसवलं. त्या आजींना वाहनात बसवून दिलं आणि मगच परभणीच्या दिशेने रवाना झाले.
त्यांच्या पडलेल्या चपला, काठी, पिशवीही उचलून त्यांच्या जवळ आणून दिली. त्यानंतर त्यांनी अंबड पोलीस ठाण्याचे प्रभारी आयपीएस अधिकारी सिद्धार्थ बारवाल यांच्याशी संपर्क साधून तातडीने मदतीच्या सूचना दिल्या. यामुळे या अधिकाऱ्यांचे कौतुक केले जात आहे.
दरम्यान, पोलीस हवालदार विष्णू चव्हाण आणि स्वप्नील भिसे शासकीय वाहनासह घटनास्थळी दाखल झाले. या आजी अंबड तालुक्यातील बेलगाव गावच्या असून त्यांच्यावर अंबड उपजिल्हा रुग्णालयात उपचार सुरू आहेत. अपंग व्यक्तींना प्रोत्साहन देणं असो की वृद्ध तक्रारदाराला स्वत: खाली येऊन भेटणं परदेशी सरांचे प्रत्येक कृतीत अधिका-यांच्या पुढे एक माणूस सतत जाणवतो.
