संतोष देशमुख यांच्या हत्येचा ‘तो’ व्हिडिओ न्यायालयात सादर, उज्ज्वल निकम यांची माहिती…
बीड : मस्साजोग गावचे सरपंच संतोष देशमुख यांच्या हत्या प्रकरणाचा खटला कोर्टात सुरू झाला आहे. आज संतोष देशमुख यांच्या हत्येचा व्हिडिओ न्यायालयात सादर करण्यात आल्याची माहिती उज्ज्वल यांनी दिली आहे. हा व्हिडिओ बाहेर येऊ नये अशी देखील विनंती त्यांनी न्यायालयाला केली आहे. जिल्हा व सत्र न्यायालयात आज दुसरी सुनावणी पार पडली.
आजच्या सुनावणीकडे राज्याचे लक्ष लागले होते. वाल्मिक कराडसह महेश केदार, सुदर्शन घुले, प्रतीक घुले, जयराम चाटे, सुधीर सांगळे यांना या प्रकरणात अटक झाली आहे, तर कृष्णा आंधळे हा आरोपी अद्याप फरार आहे. पोलिसांनी घटनास्थळी मिळालेल्या पुराव्यांच्या आधारे अनेक साक्षीदारांचे जबाब नोंदवले असून, काही गोपनीय साक्षीदारांच्याही जबाबांची नोंद झाली आहे.
आज कोर्टात वाल्मिक कराडने अर्ज सादर करत सांगितलं की, माझ्या विरोधात कोणताही ठोस पुरावा नाही. खंडणी मागितल्याचा आरोपही सिद्ध झालेला नाही. त्यामुळे मला या प्रकरणातून दोषमुक्त करण्यात यावं. त्याच्या अर्जावर पुढील सुनावणी २४ एप्रिल रोजी होणार आहे. त्या दिवशी सरकारी पक्ष आपली बाजू मांडणार आहे.
सरकारी पक्षाकडून विशेष सरकारी वकील ॲड. उज्जवल निकम यांनी युक्तिवाद केला. सुनावणीनंतर त्यांनी माध्यमांशी बोलताना सांगितले की, आज आरोपी वाल्मिक कराडने काही कागदपत्रांची जंत्री मागितली होती, ती न्यायालयात सादर करण्यात आली आहे. त्याने पुन्हा एकदा दोषमुक्ततेची मागणी केली आहे.
