मराठी भाषेला अभिजात भाषेचा दर्जा देण्यासंदर्भात राज्याचे शिष्टमंडळ लवकरच प्रधानमंत्री नरेंद्र मोदी यांची भेट घेणार – मुख्यमंत्री एकनाथ शिंदे

मुंबई : महाराष्ट्रात आज (ता.27 फेब्रुवारी) मराठी राजभाषा दिन साजरा केला जात आहे. ज्येष्ठ साहित्यिक कुसुमाग्रज यांच्या जन्मदिवसाचं औचित्य साधत हा दिवस मराठी भाषा दिवस म्हणून साजरा केला जातो. आता मराठी भाषिकांना वेध लागले आहेत ते म्हणजे आपल्या मातृभाषेला अभिजात भाषेचा दर्जा मिळावा याचे.

मराठी भाषेला अभिजात भाषेचा दर्जा देण्यासंदर्भात राज्याचे शिष्टमंडळ प्रधानमंत्री नरेंद्र मोदी यांची भेट घेवून त्यांना त्याबाबत विनंती करेल, अशी ग्वाही मुख्यमंत्री एकनाथ शिंदे यांनी आज विधानसभेत दिली.

छगन भुजबळ यांनी मराठी राजभाषा गौरव दिनानिमित्त मराठीला अभिजात भाषेचा दर्जा देण्यासंदर्भातचा मुद्दा उपस्थित केला होता. त्यावर निवेदन करताना मुख्यमंत्री शिंदे म्हणाले की, सभागृहातील सर्व सदस्यांच्या भावना लक्षात घेवून लवकरच मुख्यमंत्री, उपमुख्यमंत्री आणि राज्यातील शिष्टमंडळासह प्रधानमंत्र्यांची भेट घेईल आणि त्यांना मराठी भाषेला अभिजात भाषेचा दर्जा देण्याबाबत कार्यवाही लवकरात लवकर करावी, अशी विनंती करण्यात येईल, असे मुख्यमंत्र्यांनी यावेळी सांगितले आहे.