उरुळी कांचन, लोणी काळभोर व सहजपुर येथील गावठी हातभट्ट्यांवर राज्य उत्पादन शुल्काचा छापा; पावणे ४ लाखाचा मुद्देमाल केला जप्त, ७ जणांवर गुन्हा दाखल
उरुळी कांचन : उरुळी कांचन, लोणी काळभोर (ता. हवेली) व सहजपुर (ता. दौंड) येथील गावठी हातभट्टी दारू निर्मिती केंद्रावर राज्य उत्पादन शुल्काच्या भरारी पथकाने छापे टाकले आहे. या छाप्यात पोलिसांनी तब्बल पावणे ४ लाखाचा मुद्देमाल जप्त केला आहे. ही कारवाई शुक्रवारी (ता.२६) आणि शनिवारी (ता.२७) केली.
या छाप्यात पथकाने दारू तयार करण्यासाठी लागणारे ८४०० लिटर कच्चे रसायन व ८०५ लिटर गावठी हातभट्टी दारु, निर्मिती साहित्य व एक तीन चाकी रिक्षा वाहन असा एकुण ३ लाख ६२ हजार २०० रुपयांचा मुद्देमाल जप्त केला आहे.
तसेच अवैधपणे गावठी हातभट्टी दारुची निर्मिती करणारा भट्टी मालक, कामगार, जागामालक तसेच गावठी दारुची वाहतुक करणाऱ्या अशा ७ जणांवर महाराष्ट्र दारूबंदी कायदा १९४९ अन्वये गुन्हा दाखल केला आहे.
ही कारवाई पुणे राज्य उत्पादन शुल्क क्र २ पथकाचे निरीक्षक तानाजी शिंदे, दुय्यम निरीक्षक आर. डी. भोसले, बी. बी. नेवसे, जवान सर्वश्री किशन पावडे, गणेश वाव्हळे, कल्लेश्वर मुस्तापुरे व वाहनचालक अभिजित सिसोलेकर यांच्या पथकाने केली आहे.
