श्री विठ्ठलाची तुळशीअर्चन पूजा आता भाविकांनाही करता येणार ; मंदिर समितीच्या वतीने गुढीपाडव्याच्या शुभ मुहूर्तावर सुरुवात…!
पंढरपूर : श्री विठ्ठलाची तुळशीअर्चन पूजा आता भाविकांनाही करता येणार आहे. मंदिर समितीच्या वतीने भाविकांना तुळशीअर्चन पूजा उपलब्ध करून देण्यात आली असून, गुढीपाडव्याच्या शुभमुहूर्तावर सुरुवात करण्यात येणार असल्याची माहिती मंदिर समितीने दिली आहे.
श्री विठ्ठल रुक्मिणीचे दर्शन घेण्यासाठी दररोज हजारो भाविक येतात. मोठ्या यात्रांना तर लाखोंच्या संख्येने भाविक येतात. या भाविकांकडून श्री विठ्ठल रुक्मिणीच्या नित्यपुजा, पाद्यपुजा व चंदनउटी पुजा करण्यात येतात. या पुजांना मिळणारा प्रतिसाद पाहता तसेच भाविकांच्या मागणीनुसार तुळशी अर्चन पूजा उपलब्ध करून देण्यात येत आहेत.
कारण नित्यपुजा, पाद्यपुजा व चंदनउटी पुजा शिवाय भाविकांना पूजा सेवा करता यावी म्हणुन तुळशी पूजा उपलब्ध करून देण्यात यावे अशी मागणी केली होती .त्यानुसार मंदिर समितीच्या सभेत भाविकांना तुळशी अर्चन पुजा उपलब्ध करून देण्याचा निर्णय घेण्यात आला .त्यानुसार चैत्र शुध्द गुढीपाडव्याच्या शुभ मुहूर्तांवर तुळशी अर्चन पूजा उपलब्ध करून देण्यात येणार आहेत.
पुजा यात्रा, सण, उत्सव आदी दिवस वगळून इतर दिवशी दैनंदिन सकाळी महानैवेद्यापुर्वी, दुपारी पोषाखापूर्वी व सायंकाळी धुपारतीपूर्वी या वेळेत प्रत्येकी दहा प्रमाणे एकूण 30 पुजा उपलब्ध होणार आहेत. त्यामध्ये एका पुजेसाठी जास्तीतजास्त 5 भाविकांना प्रवेश दिला जाणार असून, त्याचे प्रतिपुजा 2100 रुपयांची देणगी मुल्य राहणार आहे. अधिक माहितीसाठी मंदिर समितीच्या नित्योपचार विभाग कार्यालयात संपर्क साधावा. असे आवाहन श्री विठ्ठल रूक्मिणी मंदिरे समितीने केले आहे.
