Sambhaji Bhide : नाशिकमध्ये राडा! संभाजी भिडे यांची गाडी अडकली, घोषणाबाजी करत दाखवले काळे झेंडे, नेमकं घडलं काय?
Sambhaji Bhide : शिवप्रतिष्ठान हिंदुस्थानचे संभाजी भिडे यांची गाडी अडवत हल्ला करण्याचा प्रयत्न झाल्याची धक्कादायक घटना समोर येत आहेत. नाशिकच्या मनमाड येथे रात्री साडेअकराच्या सुमारास हा प्रकार समोर आला असल्याची माहिती मिळत आहे.
भिडे यांना मनमाडमध्ये काल रात्री भीमसैनिकांनी काळे झेंडे दाखवत जोरदार घोषणाबाजी केली. या घटनेमुळे परिसरात काही काळ तणावाचं वातावरण निर्माण झाले होते. दरम्यान, घटनेची माहिती मिळताच पोलिसांनी घटनास्थळी धाव घेतली.
पोलिसांनी दिलेल्या माहितीनुसार, संभाजी भिडे हे गुरुवारी नाशिकच्या येवला येथे एका कार्यक्रमासाठी आले होते. कार्यक्रम संपल्यानंतर रात्री उशिरा ते कारने मनमाड मार्गे धुळ्याकडे निघाले होते तेव्हा मालेगाव चौफुलीवर भीम सैनिकांनी त्यांची गाडी अडवून घोषणाबाजी केली.
दरम्यान, आक्रमक झालेल्या कार्यकर्त्यांनी भिडे यांच्या गाडीवर हल्ला करण्याचा प्रयत्न केला. काचावर आणि गाडीच्या पुढील भागावर जोरजोरात हाताने मारण्यात आले. याचवेळी एकाने पायातील बूट काढून गाडीवर मारला. Sambhaji Bhide
यावेळी पोलिसांकडून आक्रमक झालेल्या कार्यकर्त्यांना बाजूला करण्याचा प्रयत्न करण्यात आला. पोलिसांनी रस्ता मोकळा करून दिल्यावर भिडे गुरुजी पुढे मालेगावच्या दिशेने निघाले. याप्रकरणी रात्री उशिरापर्यंत मनमाड पोलीस ठाण्यात भीमसैनिकांविरोधात गुन्हा दाखल केले आहे.
