पुण्यात सराफा दुकानावर डल्ला ;कोयत्याचा धाक दाखवून सोन्याचे दागिने लुटले, दरोडेखोर पसार..
पुणे :गेल्या काही दिवसांपासून विद्येचे माहेरघर अशी ओळख असलेल्या पुण्यात कोयता गँगची दहशत वाढत चालली आहे.आता कोयत्याचा धाक दाखवून सराफाचं दुकान लुटल्याची घटना घडली आहे. या प्रकरणाचा तपास सुरु असून ४ दरोडेखोर अद्याप फरार आहेत.
याबाबत मिळालेल्या माहितीनुसार, पुणे -सोलापूर रोड मांजरी हद्दीतील शेवाळवाडी गावामध्ये रस्त्याच्या कडेला महावीर ज्वेलर्स आहे. या सराफा दुकानात सायंकाळच्या सुमारास मालक एकटे असल्याची संधी साधून चोरट्यांनी कोयत्याचा धाक दाखवून दुकान लुटल्याची घटना घडली आहे.
कोयता हातात घेऊन दरोडेखोरांनी सराफाला धमकावत दुकानामधील सोन्याचे दागिने गोळा करण्यास सुरूवात केली. हातात लोखंडी हत्यार असल्याने मालकाला आरडाओडा केल्यास जीवे मारू अशी धमकी सुद्धा दिली. घाबरलेला दुकानदार तोंड बंद करून घाबरलेल्या अवस्थेत गप्प बसून राहिला.दरम्यान दरोडेखोरांनी दागिने पिशवीत भरले आणि घटनास्थळावरून चौघेही पसार झाले.
या घटनेनंतर घाबरलेल्या सराफाने तातडीने पोलीस ठाण्यात तक्रार केली. घडलेली घटना सीसीटीव्हीमध्ये कैद झाली असून पोलीस या घटनेचा तपास करत आहेत.मांजरी पोलीस ठाण्यामध्ये अज्ञात चोरट्या विरोधात गुन्हा दाखल करण्यात आला आहे.
