पुण्यात हगवणे प्रकरणाची पुनरावृत्ती ; सासरच्या त्रासाला कंटाळून महिलेची आत्महत्या, पाच जणांवर गुन्हा दाखल
पुणे : गेल्या काही दिवसांपूर्वीच पुण्यातील वैष्णवी हगवणे या तरुण विवाहितेच्या आत्महत्या प्रकरणामुळे संतापाची लाट उसळली होती. हे प्रकरण ताजे असतानाच आता पुण्यात सासरी होणाऱ्या त्रासाला कंटाळून एका विवाहितेने आत्महत्या केल्याने खळबळ उडाली आहे.
याबाबत मिळालेल्या माहितीनुसार, पुण्यातील फुरसुंगी परिसरात सासरी होणाऱ्या शारिरीक व मानसिक छळाला कंटाळून विवाहितेने आत्महत्या केल्याचा प्रकार समोर आला आहे.सीमा अक्षय राखपसरे (वय २४, रा. चंदवाडी, स्मशानभूमीजवळ, फुरसुंगी) असे आत्महत्या केलेल्या विवाहितेचे नाव आहे. पती कोणताही काम धंदा न करता घरात बसून असतो,मुलांसाठी बचत गटामार्फत काम करत असतानाही सासरच्या त्रासाला कंटाळून विवाहितेने गळफास घेऊन आत्महत्या केली. फुरसुंगी पोलिसांनी पतीसह पाच जणांवर गुन्हा दाखल केला आहे.
मृत विवाहीतिचे वडील रवी खलसे यांनी पोलीस ठाण्यात फिर्याद दिली आहे. त्यावरुन पोलिसांनी पती अक्षय सुरेश राखपसरे, चुलत सासरे वसंत राखपसरे, सासु आशाबाई सुरेश राखपसरे, दीर अविनाश सुरेश राखपसरे, जाऊ पुला अविनाश राखपसरे (सर्व रा. फुरसुंगी) यांच्यावर गुन्हा दाखल केला आहे. ही घटना त्यांच्या राहत्या घरात ६ ऑगस्ट रोजी सायंकाळी घडली. या प्रकरणाचा अधिक तपास पोलीस करत आहेत.
