Pune Rain Update : अतिवृष्टीमुळे पुणे जिल्ह्यातील शाळांना आज सुट्टी, सातारा जिल्ह्याला रेड अलर्ट…

Pune Rain Update : प्रादेशिक हवामान केंद्राने जिल्ह्यात ९ जुलै रोजी अति मुसळधार पावसाचा इशारा दिला असल्याने जिल्ह्यातील 12 वी पर्यंतच्या सर्व शाळांना ९ जुलै रोजी सुट्टी जाहीर करण्याचे आदेश पुण्याचे जिल्हाधिकारी डॉ. सुहास दिवसे यांनी निर्गमीत केले आहेत.

त्यानुसार आज दिवसभर शाळा बंद राहतील. जिल्हाधिकारी डॉ. सुहास दिवसे यांनी हा आदेश दिला असून पुणे जिल्ह्यातील सर्व अंगणवाडी, सर्व सरकारी व खाजगी, प्राथमिक व माध्यमिक शाळा जिल्हा परिषद शाळा, नगरपालिका, अनुदानित व विनाअनुदानित शाळा, सर्व आश्रमशाळा, महाविद्यालये व व्यवसाय आणि प्रशिक्षण केंद्र म्हणजेच आयटीआय या सर्व विद्यार्थ्यांना ९ जुलैची सुट्टी जाहीर करण्यात आली आहे. Pune Rain Update

दरम्यान, यापूर्वी जिल्हा आपत्ती व्यवस्थापनाने कालच शाळांना सुट्टी जाहीर केली होती. मात्र त्यामध्ये आंबेगाव, हवेली, जुन्नर, खेड, मुळशी, पुणे शहर, भोर, मावळ या तालुक्यांचा समावेश होता, मात्र जिल्हाधिकाऱ्यांनी सर्व शाळांना ही सुट्टी जाहीर केली आहे.

भारतीय हवामान विभागाकडून सातारा आणि पुणे जिल्ह्याला ९ जुलै रोजी रेड अलर्ट देण्यात आलाय. त्यामुळे जिल्ह्यांमध्ये अतिमुसळधार पाऊस पडण्याची शक्यता आहे. राज्यातील मुंबई, रायगड, रत्नागिरी, सिंधूदुर्ग, पुणे, सातारा या जिल्ह्यांना आज (ता.९ ) रेड अलर्टचा इशारा देण्यात आला आहे.