Pune Accident : पुणे अपघात प्रकरणी धक्कादायक माहिती आली पुढे, त्या रात्री पबमध्ये नेमकं काय घडलं? महत्वाची माहिती आली समोर…

Pune Accident : पुणे अपघाताप्रकरणी दररोज नवनवीन माहिती समोर येताना दिसत आहे. अल्पवयीन आरोपीने दोघांना पुण्यातील कल्याणीनगर येथे पोर्शे गाडीने उडवलं. या घटनेची संपूर्ण देशात चर्चा सुरु आहे.

पोर्श कार चालवणाऱ्या एका अल्पवयीन श्रीमंताने गेल्या महिन्यात दुचाकीस्वार दोन अभियंत्यांना चिरडले होते. त्यामुळे दोन्ही अभियंत्यांचा मृत्यू झाला. या प्रकरणाचा तपास अजूनही सुरू आहे. दरम्यान, आता एक धक्कादायक खुलासा समोर आला आहे.

१८-१९ मे च्या रात्री अल्पवयीन आरोपी आणि त्याच्या १५ मित्रांनी दोन्ही पबमध्ये ९० हजार रुपये खर्च केले होते. अल्पवयीन आरोपीने ४८ हजार रुपये खर्च केले. तर उर्वरित ४२ हजार रुपये त्याच्या मित्रांनी दिले. याप्रकरणी पुणे क्राईम ब्रँचने अल्पवयीन मुलाच्या या १५ मित्रांचे जबाब नोंदवले आहेत. Pune Accident

बाल न्याय मंडळाने (जेजेबी) १७ वर्षीय अल्पवयीन मुलाच्या रिमांड होमची मुदत २५ जूनपर्यंत वाढवली आहे. त्याला १२ जूनपर्यंत निरीक्षण गृहात ठेवण्यात आले होते. पुणे पोलिसांनी फिर्यादींमार्फत अल्पवयीन मुलाच्या सुरक्षेचा हवाला देत निरीक्षण गृहात ठेवण्याचा कालावधी १४ दिवसांनी वाढवण्याची मागणी केली होती.

दरम्यान,त्यांनी बोर्डाला असेही सांगितले की या क्षणी अल्पवयीन व्यक्तीची सुटका केल्याने प्रकरणाचा चालू तपास आणि १९ मेच्या अपघातानंतर घेतलेल्या रक्ताच्या नमुन्यांच्या कथित अदलाबदलीसह इतर संबंधित बाबींमध्ये अडथळा येऊ शकतो. पुणे पोलिसांच्या कोठडीत वाढ करण्याच्या याचिकेला बचाव पक्षाने विरोध केला आणि बोर्डाला सांगितले की, अल्पवयीन मुलाला निरीक्षण गृहातून सोडण्यात यावे.

पुणे कार अपघात प्रकरण काय आहे?

पुण्यात १९ मे रोजी एका महागड्या पोर्शे कारचा अपघात झाला होता. या अपघातात अनिश अवधिया आणि आश्विनी कोस्टा या दोघांचा मृत्यू झाला होता. ही महागडी गाडी विधिसंघर्षग्रस्त बालक चालवत होता, असा दावा केला जातो.

त्यानंतर हे प्रकरण दाबून टाकण्याचा प्रयत्न झाल्याचेही म्हटले जाते. याच कारणामुळे या प्रकरणाची मोठी चर्चा झाली. त्यानंतर आता पोलिसांच्या तपासात या प्रकरणी अनेक खुलासे होत आहेत.