Pradip Kand : शिरूर – हवेलीत भाजप कार्यकर्त्यांंचा येत्या रविवारी मेळावा! कार्यकर्त्यांच्या भावनांचा आदर ठेऊन निवडणूक लढविण्यावर निर्णय घेणार – प्रदिप कंद
उरुळीकांचन : शिरूर- हवेली विधानसभा मतदारसंघाची पारंपारीक जागा गमविल्याचे शल्य प्रत्येक भाजप कार्यकर्त्यांत व मतदारांत आहे. या मतदारसंघात राष्ट्रवादीचे नेते अजित पवार निवडणूक लढणार म्हणून भाजप कार्यकर्त्यांनी त्यांचा आदर ठेवीत महायुतीतून त्यांना मदत करण्याची भूमिका ठेवली होती. परंतू ते निवडणूक लढविणार नसतील तर संघटनात्मक पातळीवरील ताकद व अनुकूल परिस्थितीने भाजपला ही जागा सुटणे अपेक्षित होते. मात्र तसे न घडल्याने स्वाभाविकपणे भाजपच्या कार्यकर्ते व पदाधिकारी यांचा माझ्यावर मैत्रिपूर्ण अथवा स्वतंत्ररीत्या निवडणूक लढविण्याचा दबाव असून या संदर्भातील वरिष्ठांना भावना कळविल्या असून येत्या रविवारी समर्थकांची बैठकीत निर्णय घेऊन निवडणूक लढविणार की नाही ? याचा निर्णय घेणार असल्याची स्पष्टोक्ती शिरुर भाजप विधानसभा निवडणूक प्रमुख प्रदिप कंद प्रसारमाध्यमांनी दिली आहे.
शिरूर- हवेली विधानसभा मतदारसंघात महायुतीच्या जागावाटपात भाजपला हा मतदारसंघ सोडला गेला नसल्याने भाजपच्या शिरुर -हवेली मतदारसंघातील कोअर कमिटीच्या झालेल्या निर्णयानंतर प्रदिप कंद यांनी निवडणुकी संदर्भात आपली भूमिका मांडण्यासाठी शुक्रवार (दि.२४) सायंकाळी पत्रकार परिषद आयोजित केली होती.
यावेळी ते म्हणाले, महायुतीची उमेदवारी जाहीर झाल्यानंतर भाजपच्या शिरुर-हवेलीच्या कोअर कमिटीची बैठक झाली असून बैठकीत निवडणूक लढविण्याचा निर्णय घेतला आहे. कार्यकर्त्यांची बैठक घेऊन निवडणूक लढवायची नाही याबाबत मते जाणून घेतल्या नंतर रविवारी निवडणुकीची दिशा ठरणार असल्याचे त्यांनी स्पष्ट केले आहे. यावेळी ‘यशवंत’सहकारी साखर कारखान्याचे अध्यक्ष सुभाष जगताप, क्रीडा आघाडीचे पै. संदीप भोंडवे, हवेली तालुकाध्यक्ष शाम गावडे, शिरूर तालुकाध्यक्ष आबासाहेब सोनवणे, कामगार आघाडीचे जयेश शिंदे आदी पदाधिकारी उपस्थित होते.
यावेळी भूमिका मांडताना प्रदिप कंद यांनी मतदारसंघ पारंपारीक असल्याने व या लोकप्रतिनिधींच्या कामगिरीची नाराजीची भावना लक्षात घेता भाजपला अधिक संधी असल्याने तयारी सुरू असल्याचे ते म्हणाले. मतदारसंघ जनसंघाच्या काळा पासून भाजपकडे असल्याने या मतदारसंघात एक मोठा जणाधार पक्षाला आहे. पक्षाची संघटना मजबूत असल्याने महायुतीत हा दावा प्रबळ होता. या संदर्भात भाजपच्या वरिष्ठ नेत्यांनी हा मतदारसंघ मिळावा म्हणून दिल्ली पर्यंत करण्यात आले.परंतू यश न मिळाल्याने मिरीटच्या आधारे भाजपचा हा दावा आहे. या दाव्यानुसार भाजप कार्यकर्त्यांची अन्याची भावना असून निवडणूक लढविण्याची शिरूर-हवेली कोअर कमिटीची भूमिका आहे. या भूमिकेवर येत्या रविवारी कार्यकर्ता मेळावा घेऊन निर्णय घेणार असल्याचे प्रदिप कंद यांनी स्पष्ट केले.
अनेक प्रश्नांचे उत्तर एकच!
जिल्ह्यात ताकदीच्या मुद्दावर भाजपला मतदारसंघ सुटण्याचा मुद्दा तसेच मतदारसंघातील कामगिरीची दावेदारी, राजकीय प्रवास व बलस्थाने असताना प्रदिप कंद उमेदवारी डावलणेतसेच जिल्हा बँकेच्या निवडणूक अजित पवार यांचे आव्हान स्विकारुन विजय मिळविणे, २३ वर्षांनंतर हवेली बाजार समितीवर प्रशासक हटवून पॅनेल विजयी करणे, कारखाना प्रश्नात भूमिका घेणे आदी प्रश्न आपल्याला जागा मिळणे व उमेदवारी मिळविण्यात अडचणीचे ठरले काय ? अशा प्रश्नांच्या उत्तरावर प्रदिप कंद यांनी पक्षाने योग्य मदत केल्याचे सांगून अधिक उत्तरे देण्याचे टाळले आहे.
दरम्यान भाजपच्या कार्यकर्त्यांमध्ये तीव्र भावना असून, ही निवडणूक थेट लढली जावी म्हणून भाजपचे मतदारसंघातील ८०% कार्यकर्ते एकमतावर आहे. त्यामुळे कार्यकर्ते पूर्ण ताकदीने मैदानात उरणार असल्याचे बैठकीत पै. संदीप भोंडवे यांनी सांगितले.
