पुण्यात महिला पोलीस निरीक्षकाच्या विनयभंग प्रकरणाला राजकीय वळण ; शरद पवार गटाची एन्ट्री, काय आहे प्रकरण?
पुणे : पुण्यातील भाजपाचे पुणे शहर सरचिटणीस प्रमोद कोंढरे यांनी वरिष्ठ महिला पोलीस निरीक्षकांचा विनयभंग केल्याच्या घटनेने सर्वत्र खळबळ उडाली होती. या प्रकरणात प्रमोद कोंढरे यांच्याविरोधात गुन्हा दाखल करण्यात आला मात्र त्यांना अटक करण्यात पोलिसांनी वेळ लावला. यामुळे वातावरण तापलं असताना आता या प्रकरणात शरद पवार गटाची एन्ट्री झाली आहे. त्यामुळे या प्रकरणाला आता राजकीय वळण लागणार असल्याची शक्यता वर्तवली जात आहे.
याबाबत मिळालेल्या माहितीनुसार, पुण्यातील भाजप पदाधिकारी प्रमोद कोंढरे याने पुणे पोलिस दलातील महिला पोलीस निरीक्षकांचा विनयभंग केल्याचा गुन्हा दाखल आहे, मात्र या प्रकरणात प्रमोद कोंढरे याला अटक करण्यात आली नाही. तर महिला पोलिस निरीक्षकाची मात्र वाहतूक शाखेत बदली करण्यात आली.या निर्णयाविरोधात संबंधित महिला पोलिस निरीक्षक यांनी मॅटमध्ये धाव घेत आपल्यावर अन्याय होतो, अशी भावना आहे. या सर्व प्रकरणाची माहिती महिला पोलिस निरीक्षक यांनी आज शरद पवार यांची भेट घेऊन दिली आहे. या भेटीने राजकीय वर्तुळात चर्चांना उधाण आल आहे.
दरम्यान, या घटनेनंतर प्रमोद कोंढरे याच्यावर विनयभंगाचा गुन्हा दाखल करण्यात आला असुन देखील त्यांना अद्याप अटक केली गेली नसल्याने आता संताप व्यक्त केला जात आहे. आता या प्रकरणाला राजकीय वळण लागतंय की काय? असा सवाल विचारला जात आहे
