पुण्यात खळबळ! भाजपच्या पदाधिकाऱ्याचं संतापजनक कृत्य, महिला वैद्यकीय अधिकाऱ्याचा छळ केल्याप्रकरणी गुन्हा दाखल
पुणे : पुण्यातून एक खळबळजनक घटना समोर आली आहे. महापालिकेत काम करणाऱ्या एका महिला वैद्यकीय अधिकाऱ्याचा छळ केल्याप्रकरणी भाजपचे कामगार आघाडीचे शहराध्यक्ष ओमकार कदम यांच्यावर छेडछाडीचा गुन्हा दाखल करण्यात आला आहे.
पोलिसांकडून या महिला अधिकाऱ्यांचे जबाब नोंदवण्यात आले आहेत. या प्रकरणात आणखी एक धक्कादायक बाब म्हणजे बरेच महिने लोटल्यानंतर या घटनेची पोलिसांनी नोंद केली आहे. आरोपी सत्ताधारी पक्षाचा कार्यकर्ता असल्याने पोलिसांनी गुन्हा नोंदवण्यात दिरंगाई केली असा पीडित महिलेने दावा केला आहे.
याबाबत महिलेने दिलेल्या तक्रारीवरून, कदम हे वारंवार फिर्यादी यांच्या कार्यालयात येऊन त्यांचा शाब्दिक छळ करायचे आणि त्यांच्या संमतीशिवाय व्हिडिओ रेकॉर्ड करायचे. या त्रासाला कंटाळून पीडित महिला कर्मचाऱ्याने ओमकार कदम यांच्याविरोधात पोलिसांत तक्रार दाखल केली. त्यानुसार भारतीय न्याय संहितेच्या विविध कलमांखाली कदम यांच्यावर गुन्हा नोंदवण्यात आला आहे.
हा प्रकार २४ जानेवारी २०२५ रोजी घडला असून त्याची तक्रार १७ जून २०२५ रोजी नोंदवण्यात आली आहे. सत्ताधारी पक्षाचा शहराध्यक्ष असल्याने कारवाईला जाणूनबुजून विलंब केला गेला अशी फिर्यादी महिलेची तक्रार आहे. या प्रकारांमुळे पोलिसांच्या कार्यक्षमतेवर पुन्हा एकदा प्रश्न चिन्ह निर्माण झाले आहे.
गुन्हा दाखल करण्यास पोलिसांकडून इतका विलंब का झाला? अशी चर्चा आता सुरु झाली आहे. परंतु पोलिस कारवाईच्या अभावामुळे संभाव्य राजकीय हस्तक्षेपाबाबत चिंता निर्माण झाली होती. कदम यांना भाजपच्या कोणत्या वरिष्ठ नेत्याचा पाठींबा आहे का? ज्यामुळे पोलिसांनी या घटनेची लवकर दाखल घेतली नाही. अशी चर्चा होऊ लागली आहे. दरम्यान, या प्रकरणी योग्य कारवाई होऊन न्याय मिळेल अशी भावना पीडित महिलेने व्यक्त केली आहे.
