सावधान! एक क्लिक अन् २२ कोटी पाण्यात, पुण्यातील आजोबांसोबत धक्कादायक घडलं…
पुणे : पुण्यात एका ८५ वर्षीय ज्येष्ठ नागरिकाला तब्बल २२ कोटी ७० लाख रुपयांचा गंडा घालण्यात आला आहे. या प्रकरणी पुणे सायबर पोलिसांनी तांत्रिक तपास करत छत्रपती संभाजीनगर येथून आठ जणांच्या टोळीला अटक करण्यात आली आहे.
तसेच या कारवाईमुळे आंतरराज्य सायबर रॅकेट उघडकीस येण्याची शक्यता वर्तवली जात आहे. मिळालेल्या माहितीनुसार, तक्रारदार ज्येष्ठ नागरिकाला सोशल मीडियाच्या माध्यमातून शेअर मार्केटमध्ये गुंतवणुकीबाबत संपर्क साधण्यात आला होता.
आरोपींनी त्यांना एका व्हॉट्सॲप ग्रुपमध्ये सामील केले, जिथे आयपीओ आणि शेअर मार्केटमधून अवघ्या काही दिवसांत कोट्यवधींचा नफा कसा मिळवता येतो, याचे खोटे आमिष दाखवण्यात आले. तसेच विश्वासासाठी आरोपींनी त्यांना एका बनावट ॲपवर त्यांच्या गुंतवणुकीचा आभासी नफाही दाखवला.
दरम्यान, या आमिषाला बळी पडून पीडित वृद्धाने वेळोवेळी विविध बँक खात्यांमध्ये एकूण २२ कोटी रुपये गुंतवले. मात्र, जेव्हा त्यांनी हा नफा काढून घेण्याचा प्रयत्न केला, तेव्हा आरोपींनी तांत्रिक कारणे सांगून अधिक पैशांची मागणी केली. आपली फसवणूक झाल्याचे लक्षात येताच त्यांनी सायबर पोलिसांकडे तक्रार नोंदवली.
याची तक्रार प्राप्त होताच पुणे सायबर पोलिसांनी पैशांच्या व्यवहाराची माहिती घेतली. तसेच तपासाची चक्रे फिरवत पोलिसांनी छत्रपती संभाजीनगरमध्ये छापेमारी केली. तेथून ८ जणांना अटक करण्यात आली आहे.
त्यांच्याकडून मोठ्या प्रमाणात सिम कार्ड्स, मोबाईल फोन आणि संशयास्पद बँक खात्यांची माहिती जप्त करण्यात आली आहे. प्राथमिक तपासात या आरोपींनी अशाच प्रकारे इतर अनेक लोकांचीही फसवणूक केल्याचे समोर आले आहे.
