साबरमती -आगरा सुपरफास्ट एक्स्प्रेसचा भीषण अपघात; मालगाडीला धडक, डबे रुळावरून घसरले
अजमेर : मदार रेल्वे स्थानकाजवळ साबरमती-आग्रा कॅन्ट सुपरफास्ट एक्स्प्रेस आणि मालगाडी यांच्यात धडक झाल्याची घटना राजस्थानच्या अजमेरमधून समोर आली आहे. हा अपघात एवढा भीषण होता की, साबरमती आग्रा कॅन्ट सुपरफास्ट एक्स्प्रेसच्या इंजिनसह ४ डबे रुळावरून घसरले.
सुदैवाने या अपघातात कोणतीही जीवीतहानी झालेली नाही. अजमेरमधील मदार स्टेशनजवळ रात्री १.१० वाचताच्या सुमारास हा भीषण अपघात झाला आहे.
मिळालेल्या माहितीनुसार, राजस्थानमधील अजमेर येथे सोमवारी मध्यरात्री साबरमती-आग्रा सुपरफास्टचे चार डबे रुळावरून घसरले. या अपघातात अनेक प्रवाशांना किरकोळ दुखापत झाली आहे. अजमेरमधील मदार रेल्वे स्थानकावर मध्यरात्री १.०४ वाजता साबरमती-आग्रा कॅन्ट सुपरफास्ट एक्स्प्रेसची मालगाडीला धडक बसल्याने हा भीषण अपघात झाला.
लोको पायलटने ट्रेन थांबवण्यासाठी आपत्कालीन ब्रेकही लावला, पण तोपर्यंत फार उशीर झाला होता. दोन गाड्या एकमेकांसमोर आल्या आणि हा अपघात झाला. या घटनेनंतर, रेल्वे प्रोटेक्शन फोर्स, गव्हर्नमेंट रेल्वे पोलीस यांच्यासह अतिरिक्त विभागीय रेल्वे व्यवस्थापक आणि वरिष्ठ अधिकारी यांच्यासह बचाव पथक घटनास्थळी दाखल झाले. त्यानंतर तत्काळ रुळावरून घसरलेले डबे आणि इंजिन पुन्हा रुळावर आणण्याचे प्रयत्न सुरू करण्यात आले.
या घटनेनंतरचा व्हिडीओही समोर आला असून, त्यामध्ये रुळावरून घसरलेल्या डब्यांची तपासणी सुरू असल्याची माहिती मिळत आहे. या धडकेमुळे रेल्वेचे काही खांबही रेल्वेच्यावर पडले असून ते गॅस कटरच्या सहाय्याने कापले जात असल्याची माहिती देण्यात आली आहे.
दरम्यान, अपघाताची माहिती मिळताच, मदत पथक घटनास्थळी पोहोचले आणि त्यांनी जखमींना रुग्णालयात दाखल केले. या घटनेत सुदैवाने जीवितहानी झालेली नसून काही प्रवाशांना किरकोळ दुखापत झाली आहे. जखमींना उपचारासाठी अजमेर स्थानकात नेण्यात आले, असल्याचे सांगण्यात आले आहे.