अनैतिक संबंधात अडथळा, पत्नीने थेट पतीलाच संपवलं, पेट्रोल टाकलं अन् पेटवूनच दिलं….
बुलढाणा : अनैतिक संबंधात अडसर ठरत असल्याने पत्नीने पतीवर पेट्रोल टाकून त्याला जिवंत पेटवून दिल्याची धक्कादायक घटना बुलढाणा शहराजवळील तार कॉलनीत घडली. या घटनेत पती रणधीर हिंमत गवई गंभीर जखमी झाले होते. उपचारादरम्यान त्यांचा मृत्यू झाला. यामुळे एकच खळबळ उडाली आहे.
याबाबत तपास सुरू आहे. याबाबत माहिती अशी की, मेहकर तालुक्यातील पाचला गावचे रहिवासी रणधीर गवई आणि त्यांची पत्नी लता गवई हे विभक्त राहत होते. दोघांमध्ये न्यायालयीन वाद सुरू होता. १३ जानेवारीच्या रात्री रणधीर पत्नीच्या घरी आले. मध्यरात्री दोन वाजता दोघांमध्ये वाद झाला.
या वादातून संतापलेल्या लताने पतीच्या अंगावर पेट्रोल टाकून त्यांना जिवंत पेटवले. शेजाऱ्यांनी आरडाओरड ऐकून आग विझवण्याचा प्रयत्न केला. मात्र त्यांचा मृत्यू झाला. पोलिसांनी घटनास्थळी धाव घेतली आणि गंभीररित्या भाजलेल्या रणधीर यांना तत्काळ जिल्हा सामान्य रुग्णालयात दाखल केले.
उपचार सुरू असताना रणधीर यांचा मृत्यू झाला. रणधीर यांनी निधनाआधी पोलिसांना दिलेल्या जबानीत अनैतिक संबंधांमुळे पत्नीने त्यांना जिवंत पेटवल्याचा आरोप केला होता. या जबानीच्या आधारे पोलिसांनी लता गवई यांच्यावर गुन्हा दाखल केला आहे.
पत्नीला अटक करण्यात आली असून तिच्याविरोधात विविध कलमांनुसार गुन्हा दाखल करण्यात आला आहे. रणधीर गवई यांच्या निधनामुळे हळहळ व्यक्त केली जात आहे. बुलढाण्यातील ही घटना पहिली नसून यापूर्वीही अनैतिक संबंधांमुळे हत्या झाल्याच्या घटना समोर आल्या आहेत.
