सर्वसामान्यांना मोठा झटका; वीज दारात मोठी वाढ…!
मुंबई : नवीन आर्थिक वर्षाच्या पहिल्याच दिवशी राज्यातील जनतेला मोठा धक्का बसला आहे. आजपासून वीज दर महाग झाले आहेत. याचा परिणाम प्रत्येक घरावर होणार आहे. आता दर महिन्याला त्यांना वीज वापरासाठी अधिक शुल्क भरावे लागणार आहे.
महाराष्ट्र वीज नियामक आयोगाने १ एप्रिल २०२३ पासून नवीन दर लागू केले आहेत. वीज वितरणच्या प्रामुख्याने चार कंपन्या आहेत. महाराष्ट्र राज्य वीज वितरण कंपनी लिमिटेड राज्य सरकारद्वारे चालवली जाते. ही महाराष्ट्र राज्य विद्युत मंडळाची उपकंपनी आहे.
याशिवाय टाटा पॉवर आणि अदानी इलेक्ट्रिसिटी खाजगी क्षेत्रातही वीज वितरण करतात. याशिवाय मुंबईत बेस्टकडून प्रामुख्याने वीजपुरवठा केला जातो. वीज दरात ५ ते १० टक्के वाढ करण्यात आली आहे.
अशा परिस्थितीत प्रत्येक घराचे वीज बिल किमान ५ ते १० टक्क्यांनी वाढेल. आर्थिक वर्ष २०२३-२४ आणि आर्थिक वर्ष २०२४-२५ साठी दरवाढ करण्यात आली आहे.
महावितरणचे नवे दर :
महावितरणने २०२३-२४ या आर्थिक वर्षासाठी २.९ टक्के आणि २०२४-२५ या आर्थिक वर्षासाठी ५.६ टक्के वाढ केली आहे. या वाढीमुळे आर्थिक वर्ष २०२५ पर्यंत निवासी विजेच्या दरात ६ टक्के वाढ झाली आहे. आर्थिक वर्ष २०२४ मध्ये औद्योगिक वीज दर १ टक्के आणि आर्थिक वर्ष २०२५ मध्ये ४ टक्के वाढले आहेत.
टाटा पॉवरचे नवे दर :
टाटा पॉवरच्या वीज दरांबद्दल बोलायचे झाल्यास, २०२४ साठी दर ११.९ टक्के आणि २०२५ साठी १२.२ टक्के वाढवले आहेत. या दरवाढीमुळे, निवासी विजेच्या दरात आर्थिक वर्ष २०२४ मध्ये १० टक्के आणि आर्थिक वर्ष २०२५ मध्ये २१ टक्के वाढ झाली आहे. उद्योगासाठी आर्थिक वर्ष २०२४ मध्ये ११ टक्के आणि आर्थिक वर्ष २०२५ मध्ये १७ टक्क्यांनी दर वाढले आहेत.
