मुढंवा जमीन प्रकरण ; ‘पार्थ पवार कुकुल बाळ नाहीत, त्यांनी फ्रॉड केलाय’; अंजली दमानिया संतापल्या

पुणे:गेल्या काही दिवसापासून पुण्यातील मुढंवा जमीन गैरव्यवहार प्रकरण चांगलं चर्चेत आले आहे. याप्रकरणी उपमुख्यमंत्री अजित पवार यांचे पुत्र पार्थ पवार चांगलेच अडचणीत आले आहेत.या जमीन व्यवहार प्रकरणाचे खापर अजित पवार यांनी अधिकाऱ्यांवर फोडलं.अजित पवारांच्या या वक्तव्यावरती आता सामाजिक कार्यकर्त्या अंजली दमानिया यांनी संताप व्यक्त केला आहे.’पार्थ पवार कुकुल बाळ नाहीत, त्यांनी फ्रॉड केलाय’असं त्यांनी म्हटलं आहे.

राज्याचे उपमुख्यमंत्री अजित पवार यांचे पुत्र पार्थ पवार यांच्या ‘अमेडिया’ कंपनीच्या कोरेगाव पार्क येथील 40 एकर जमीन विक्री प्रकरणात प्रमुख अधिकारपत्रधारक शीतल तेजवानीला पुणे पोलिसांच्या आर्थिक गुन्हे शाखेने अटक केली. या प्रकरणात पार्थ पवार यांच्यावर अद्याप कोणतीही कारवाई झालेली नसल्याने विरोधकांनी अजित पवारांवर हल्लाबोल केला आहे.

दरम्यान उपमुख्यमंत्री अजित पवार यांनी पुण्यातील जमीन व्यवहार प्रकरणाबाबत एक मोठं वक्तव्य केले आहे. या प्रकरणी व्यवहार होत असताना अधिकाऱ्यांनी कागदपत्र पडताळणी करणे आणि चुकीच्या बाबी असल्याचे लक्षात आल्यानंतर भूमिका घेणे अपेक्षित होते. अधिकाऱ्यांकडून कारवाई झाली असती तर पुढील प्रकार घडला नसता, असे अजित पवारांनी अनौपचारिक चर्चेत म्हटले आहे. त्यामुळे पुण्यातील जमीन व्यवहार प्रकरणाचे खापर अजित पवार यांनी अधिकाऱ्यांवर फोडल्याचे दिसून आले.

यावर अंजली दमानियांनी म्हटलंय की, मला असं वाटतं की लहान मुलं जेव्हा शाळेत जातात, जेव्हा ती कुकूला बाळ असतात, तेव्हा ते मारामारी करतात, तेव्हा असं वाटतं की टीचरने त्यांना थांबवायला हवं होतं, मारामाऱ्या होऊ द्यायला नको होत्या. तसंच काहीस विधान मला अजित पवारांचं वाटत आहे. त्यांचा पार्थ पवार काही कुकूला बाळ नाही आणि त्यांनी जे केली ती चूक नाही, हे फ्रॉड आहे असे त्यांनी म्हटले आहे.

पार्थ पवारांनी एकदा नाही तर सगळे डॉक्युमेंट बदलून जे पहिल्यांदा सप्लीमेंट एलएलपी बनवलं, रेसुलेशन पास केलं, खोटा एलओआय घेतला, त्यानंतर एडजुडिकेशन केलं, सेल डिल केलं आणि त्यानंतर पझेशन पर्यंत जर ह्या व्यक्तीने सगळं केलं असेल तर ही काही छोटी मोठी चूक नाही हे फ्रॉड आहे, आणि तो पूर्ण मोठा झालेला तुमचा मुलगा आहे, त्यामुळे याच्यात अधिकाऱ्यांची चूक नाही जर त्यांना मुलाची चूक दिसत नसेल, तर त्याची दृष्ट काढा आणि त्याला घरात बसवा आम्हाला जे लढायचं आहे ते आम्ही लढणार आहोतच असंही अंजली दमानिया यांनी म्हटलं आहे.