संत तुकाराम महाराजांच्या पालखी सोहळ्यासाठी लोणीकाळभोर नगरी सजली! लोणीकाळभोर व कदमवाकवस्ती ग्रामपंचायतीची जय्यत तयारी…
लोणी काळभोर : लोणी काळभोर (ता. हवेली) येथे मुक्कामी येणार्‍या जगतगुरू संत तुकाराम महाराजांच्या पालखी सोहळ्याच्या स्वागतासाठी कदमवाकवस्ती व लोणी काळभोरचे ग्रामस्थ सज्ज झाले असून वारक-यांना सोयीसुविधा पुरविण्यासाठी दोन्ही ग्रामपंचायती समवेत पोलीस प्रशासन, महसूल खाते, प्राथमिक आरोग्य केंद्र आपापल्या परीने सुसज्ज झाले आहे.
पुणे शहरातील दोन दिवसांचा मुक्काम आटोपून रविवार (ता२२) जगतगुरू संत तुकाराम महाराज यांची पालखी सोहळा हवेली तालुक्यातील लोणी काळभोर व कदमवाकवस्ती येथील नवीन पालखी तळावर मुक्कामी येणार आहे. कदमवाकवस्ती ग्रामपंचायतीचे उपसरपंच नासिर पठाण व ग्रामविकास अधिकारी अमोल घोळवे यांनी दिलेल्या माहितीनुसार पालखी तळावर निवास व भोजन व्यवस्थेसाठी प्रत्येकी एक वॉटरप्रुफ मंडप उभारण्यात आले आहेत.
तसेच या ठिकाणी कोणाचीही गैरसोय होऊ नये म्हणून विद्युत, आरोग्य सेवा, पोलीस, व्हिआयपी व हिरकणी कक्षाची उभारणी करण्यात आली आहे. याचबरोबर एकाच वेळी सुमारे १५० जणांची अंघोळ होईल अशी व्यवस्था करण्यात आली आहे. ते पुढे म्हणाले की सोहळ्यांतील वारक-यांना पिण्यासाठी इंदिरा नगर, एंजल हायस्कूल, कवडी, कदमवस्ती व कदमवाकवस्ती ग्रामपंचायत कार्यालय या ठिकाणच्या आर. ओ. प्लॅन्ट मधून वारक-यांना पिण्यासाठी पाणी पुरवण्यात येणार आहे. संबंधित दिंडी प्रमुख किंवा वारक-यांनी कदमवाकवस्ती ग्रामपंचायतीशी संपर्क साधावा असे आवाहन उपसरपंच नासिर पठाण यांनी केले आहे.
सोहळा जरी कदमवाकवस्ती ग्रामपंचायतीचे हद्दीत असला तरी ८० टक्के वारकरी लोणी काळभोर ग्रामपंचायत हद्दीत मुक्कामी असतात. वारक-यांच्या सोयीसाठी ग्रामपंचायतीच्या वतीने आठवडा बाजार मैदान, छत्रपती शिवाजी महाराज उद्यान, गावठाण परिसर, गावातील प्रमुख रस्ते, पृथ्वीराज कपूर मेमोरियल हायस्कूलचे मैदान, कन्या प्रशाला, मराठी शाळेचे मैदान व गावातील सर्व मंदिरे या ठिकाणी स्वच्छता मोहीम राबवून साफसफाई करण्यात आली आहे. व सर्व ठिकाणी शौचालयाची व्यवस्था करण्यात आली आहे. तसेच वारक-यांना पिण्यासाठी स्वच्छ व शुद्ध पाणी मिळण्यासाठी परिसरातील विहिरींमध्ये टीसीएल टाकून पाणी शुद्ध करण्यात आले आहे. तसेच नागरिकांना मेडिक्लोरच्या बाटल्यांचे मोफत वाटप करण्यात आले आहे. डासांच्या निर्मूलनासाठी फाॅगिंग मशीनच्या माध्यमातून धूर फवारणी करण्यात येत आहे अशी माहिती लोणी काळभोरचे सरपंच भरत काळभोर व ग्रामविकास अधिकारी वनवे यांनी दिली.
लोणी काळभोर येथील प्राथमिक आरोग्य केंद्रही पालखी सोहळ्यातील वारक-यांना आरोग्य सेवा पुरविण्यासाठी सज्ज असल्याची माहिती वैद्यकीय अधिकारी मेहबूब लुकडे व डॉ. डी. जे. जाधव यांनी दिली. ते पुढे म्हणाले कि मांजरी फार्म, कवडीपाट टोलनाका, कदमवाकवस्ती ग्रामपंचायत कार्यालय, प्राथमिक आरोग्य केंद्र, पालखी तळ या ठिकाणी वारक-यांच्या मोफत उपचारासाठी तात्पुरती मदत केंद्र २४ तास चालू करण्यात येणार आहेत. ज्या ३० विहिरी व ३८ बोअरवेेल व हातपंपाबंमधून वारक-यांना पाणी पुरवठा करण्यात येणार आहे त्या प्रत्येक ठिकाणी आरोग्य विभागाच्या एक कर्मचारी नेमण्यात आला आहे. व माहितीसाठी फ्लेक्स लावण्यांत आलेले आहेत. त्यामुळे फक्त शुद्ध केलेले पाणीच टॅन्कर मध्ये भरून देण्यात येईल.
परिसरातील १०० हाॅटेलमधील पिण्याचे पाणी शुद्ध करण्यात आले आहे. व त्यांना स्वच्छतेेबाबत आवश्यक त्या सर्व सुचना करण्यात आलेल्या आहेत. आरोग्य केंद्रातील ३ वैद्यकीय अधिकारी ४ आरोग्य सहाय्यक, ५ आरोग्य सेवक व ३० आशा स्वयंसेेविका या पथकाच्या माध्यमातून वारक-यांना उच्च दर्जाची तातडीची आंतररूग्ण व बाह्यरूग्ण आरोग्य सेवा उपलब्ध करून देण्यास प्राधान्य देण्यात आले आहे. तसेच १०२ च्या ७ व १०८ ची १ रुग्णवाहिका तैनात करण्यात आल्या असल्याची माहिती वैद्यकीय अधिकारी डॉ. मेहबूब लुकडे यांनी दिली.
