Lok Sabha Election 2024 : लोकसभा निवडणुकांचे बिगुल शनिवारी वाजणार, आयोगाकडून उद्या होणार घोषणा…

Lok Sabha Election 2024 : बहुप्रतीक्षित लोकसभा निवडणुकांचे बिगुल उद्या (शनिवारी) वाजणार आहे. उद्या दुपारी तीन वाजता केंद्रीय निवडणूक आयोगाची पत्रकार परिषद होणार आहे.या पत्रकार परिषदेमध्ये निवडणुकीची घोषणा केली जाईल.

निवडणूक आयोगाच्या सर्व सोशल मीडिया प्लॅटफॉर्मवरून याचे लाईव्ह स्ट्रिमिंग केले जाईल. निवडणुकीची घोषणा होताच देशभरात आचारसंहिता लागेल. सात ते आठ टप्प्यांमध्ये लोकसभेची निवडणूक होण्याची शक्यता सूत्रांकडून वर्तवण्यात आली आहे.

केंद्रीय निवडणूक आयुक्त अरुण गोयल यांनी लोकसभा निवडणुकीच्या तोंडावर तडकाफडकी राजीनामा दिला होता. तर निवडणूक आयुक्तांचे एक पद आधीच रिक्त आहे.

या दोन्ही पदांवर पंतप्रधान नरेंद्र मोदी यांच्या अध्यक्षतेखालील समितीने माजी सनदी अधिकारी सुखबीर सिंह संधू आणि ज्ञानेश कुमार यांची नियुक्ती केली. Lok Sabha Election 2024

त्यानंतर शुक्रवारी लोकसभा निवडणुकीच्या तयारीसंदर्भात आढावा बैठक घेण्यात आली. जवळपास ४५ मिनिटे ही बैठक सुरू होती. या बैठकीनंतर शनिवारी दुपारी पत्रकार परिषद घेत लोकसभा निवडणुकीच्या तारखांची घोषणा करण्यात येणार असल्याचे निवडणूक आयोगाने जाहीर केले आहे.